政情：搞搞政：立會加增薪點撐副學士

立法會秘書處早前搞公開比賽徵集本地藝術品，擺放喺將來嘅新立法會大樓畀市民觀賞，鼓勵本地藝術創作同培養市民觀賞公共藝術嘅文化，政府又立即照抄，為添馬艦新政府總部搞咗個幾乎一樣嘅比賽，同立法會鬥搶藝術品。

最搞笑嘅係，政府仲一度想搶先公布新政府總部藝術品徵集比賽嘅結果，好彩途中畀立法會發現咗，最後變成兩個比賽結果同日公布。抄完人橋仲想截人胡，呢啲行徑認真唔要得！

立法會見政府抄橋抄上癮，就諗咗條新橋，歡迎抄襲造福市民。各黨派一直爭取政府喺招聘公務員時公道啲對班副學士生，但政府至今懶理，咁啱立法會搬去面積大幾倍嘅新大樓後，秘書處各個部門嘅各個職級都要請多好多人，班議員於是就聯同秘書處建議，將來如果喺一啲非學位職位請到副學士生，會相對一般中七畢業生額外畀多一個增薪點，以示認同佢哋嘅學歷同辛勞。如果有關建議最後獲得通過，好可能係首個公營機構落實類似安排。

喂！招聘公務員係公務員事務局嘅範疇，咁即係歡迎局長「Ｄ姐」俞宗怡拿拿臨抄橋加副學士生人工，咪再反應遲鈍，又當聽唔到、睇唔到喇！