政情：金刀梁揼梁栢賢心口
公立醫院爆發醫生離職潮，醫生工會仲醞釀發起工業行動，舊年十一月先上任嘅醫院管理局行政總裁PY梁栢賢都好頭痕。佢尋日抽空出席一個器官捐贈推廣活動，聽一班器官受贈者分享重生喜悅，冷不防席間畀人叫「磅水」。邊個咁大膽？咪就係外號「金刀梁」嘅行政會議成員梁智鴻囉。
一直好支持器官捐贈嘅金刀梁係嘉賓之一，佢致辭時提到自己當年做醫管局主席時，醫管局每年所獲撥款大約三百億元，但今時今日已加碼到三百九十幾億！講到呢度佢話鋒一轉，話雖然未知醫管局今年會放幾多錢落器官移植服務，但相信喺PY治下一定有多冇少，仲賣口乖稱呼PY做「老總」，要代一班等候器官移植嘅病人預先多謝梁老總咁話。PY喺台下笑而不語，好似唔識反應。
金刀梁（後左）及梁栢賢（後中）同三位獲善心人捐出屍腎嘅小朋友切蛋糕，寓意佢哋重獲新生。