政情：肥彭未入主BBC先頭痕

「肥彭」彭定康爭做英國廣播公司信託（BBC）主席，肥肉未到口，是非卻接踵而至，繼被外界質疑靠關係搶筍工後，尋日又有消息傳出，雖然佢得到英國政府提名，但係上任之路仍然多風多雨，顛簸難行。

據英國報章報道，BBC嘅編採方針一向「重美輕歐」，舉例喺美國聘有五十五人，但專責採訪歐洲新聞嘅巴塞隆拿分部卻只有十五人，就算全個歐洲嘅員工數目亦唔及喺美國嘅一半，孰重孰輕，一目了然。而曾任歐盟外交事務專員嘅肥彭，親歐作風遠近馳名，日後新官上任三把火，隨時要BBC改弦易轍，咁就有可能爆發「歐美大戰」嘞，事關BBC舊臣未必輕易就範，肥彭未上任，可能已遭排擠同責難，今次真係有排頭痕。

其實，英國政府提名肥彭接掌BBC，仲有待英國文化大臣作最後拍板，肥彭都未正式獲聘已是非多多，最終會唔會陰溝裏翻船呢？大家拭目以待嘞！