政情：余若薇唔做公文袋黨魁
政情：余若薇唔做公文袋黨魁
公文袋嘅立法會議員「袋巾傑」梁家傑尋日喺大氣電波透露，有意喺下月初嘅公文袋大會上競逐黨魁之位，又話曾經游說現任黨魁余若薇留任，但余去意已決，咁即係話，公文袋「余若薇時代」快將結束。袋巾傑話，余若薇同佢講，領導層要不斷更新同輪替，個黨先至可持續發展喎。
余若薇能否如願以償，要睇過先知，但佢落台走人，就係勢所難免，唔到佢想唔想。事關佢一手帶領公文袋夥拍社民連喺今年年中走入變相「五區公投」不歸路，結果慘淡收場，更令公文袋民望下挫，佢嘅聲勢亦大不如前。其實，當時已有聲音質疑佢應該要問責下台，依家至走人遲咗啦！