政情：搞搞政：張炳亂噏讚天水圍名靚
政情：搞搞政：張炳亂噏讚天水圍名靚
尋日行政會議成員張炳良落區，應邀出席「天水圍社區協作平台」辦事處嘅開幕禮，難得內閣成員山長水遠入到去天水圍，一班居民當然唔會淨係同佢飲茶灌水咁簡單啦，先後遞交請願信同一個寫住「天價」嘅鐵籠，希望呢位內閣成員正視當區嘅民生問題。
雖然畀居民請願贈興，但張炳一直保持笑容，致辭時仲猛讚天水圍個名好靚，起初話個名好似「天與水之間」，之後又話有啲似香格里拉喎！
吓！張炳係咪擦錯鞋油呀？眾所周知，天水圍曾一度發生連串倫常慘劇，揭發區內社區設施同支援服務不足，更被稱為「悲情城市」，後來有政界人士話天水圍改錯名，好似「天水圍城」咁唔老利，仲呼籲政府為天水圍改名添！所以張炳讚到天花龍鳳都冇用，事關天水圍仍然存在好多社區炸彈，佢應該篤住政府以實際行動去幫啲居民先啱。
設計圖片