政情：鬍鬚曾搵替身扮佢遮醜
政情：鬍鬚曾搵替身扮佢遮醜
財爺鬍鬚曾就明年二月新一份預算案嘅公眾諮詢今日展開，猶記得今年初，鬍鬚曾拍咗一輯預算案諮詢宣傳片，其鬼祟「竊聽」同「攝青鬼」驚嚇造型，劣評如潮。佢可能自知形象唔討好，喺尋晚推出嘅三十秒新一份預算案諮詢宣傳片中，佢只係尾段現身三幾秒，變相摺埋。
鬍鬚曾尋日喺網誌預告推出預算案全新電台宣傳片同電台聲帶，話自己過去兩年參與宣傳片演出，外間反應不俗，今年決定再度粉墨登場，又話自知缺乏演藝細胞，絕非「視帝」之材，一而再拍宣傳片，只係為引起公眾對預算案嘅關注喎。
佢喺上一輯宣傳片中惹嚟外界狂轟，今次宣傳片改為由數位老中青演員「黐鬚」扮鬍鬚曾，發表對預算案嘅心聲，鬍鬚曾臨尾現身，話「留意見，唔使留鬚嘅」，叫大家踴躍發表意見。既然鬍鬚曾自知冇演藝細胞，倒不如直頭唔好上鏡啦！