小白觀點：Brokenhagen信半成都死

可樂唔止好飲，有外國研究仲可殺精添。唔係啩，原來可樂嘅殺菌消毒力仲勁過洗手液，幾蚊支真係抵。不過本欄就唔係好信，我見豪伯一日啪幾罐可樂，依然精力充沛，朝氣勃勃，不知幾有勁。

咁就當然啦，原來呢個研究係嚟自丹麥哥本哈根大學，唔好以為舶來貨一定權威至得o架，哥本哈根Copenhagen一早已經被人笑係Brokenhagen，根本就冇乜說服力，真係信佢半成都死。

再講吖，近年哥本哈根雖然唔夠東莞Fight，畢竟仲係北歐著名嘅「性都」，當地人就算係分單雙日發炮，消耗量都好驚人，彈藥好自然所餘無幾少啲啦。自五十年代尾解放軍一口氣打咗幾十萬個炮彈狂轟金門，中國人好耐都冇發炮，忍咗咁多年，依家大國崛起，仲有大把貨，哎呀，外訪上海世博作客嘅丹麥美人魚銅像真係要小心呀！

e-mail：sunsiupak@gmail.com

Blog：http://sunsiupak.blogspot.com

阿豪觀點：狂隊可樂食豆腐睇吓點

可樂殺精，原來有機會係堅嘅。丹麥哥本哈根大學研究發現，男人每日飲超過一公升可樂，精子數量可能減少三成喎。關於呢類醫學趣聞，老實講，豪伯都係聽完笑吓就算，唔係因為特別鍾意飲可樂，而係因為呢一類消息成日都自我矛盾，都唔知信得邊次好。嗱，好似Omega-3咁呀，之前講到鬼咁神奇，話可以預防心臟病、癌症甚至中風咁，但之後又話研究咗三千人，發現服用魚油丸嘅人死於心臟病嘅機率比冇食嘅高。

與其信人，不如信自己，豪伯建議各位男士，喺未來一年裏面，做足晒傳聞可以殺精嘅事，除咗日飲一升可樂，仲要多啲着窄身褲、長期放手機喺褲袋兼夾狂食豆腐，照計精子數量呢度減三成，嗰度又減兩成，應該得番攤水至啱，如果一年後仍然生得到仔，就證明呢啲所謂科學研究係搵笨嘅！

e-mail：lukchiho75@hotmail.com

Blog：http://lukchiho.blogspot.com

網友觀點……

雪碧哥：世界上鍾意飲可樂嘅人唔少，但唔覺人口愈嚟愈少喎。

孱仔強：若然係真，可樂大可轉型生產男性避孕飲品吖！

big head：之前有個research話港人性生活少之又少，依家仲話可樂會殺精，似乎大家想生仔都難。

vincent 1977：我一啲都唔怕，殺極都仲有成億……

有料爆：

架車掛住個立法會logo好威咩，哼！

SMS傾埋一份：6016 2496