70、80後成長時，剛處於玩具、卡通同遊戲機嘅黃金時代，四驅車、《Slam Dunk》、《拳皇97》同《熱血高校躲避球》套套睇完再睇、玩完再玩，堪稱經典中嘅經典。雖然以上作品分分鐘大過我同你嘅仔女，但最近佢哋不約而同地以手機遊戲方式復活，並且加入新元素、新玩法。今晚一於撇低屋企隻老虎乸，重拾通宵打機嘅樂趣啦！
遊戲早前舉行發布會，並請來賽車女郎介紹玩法，令現場升溫！
此乃實體化「雞排號」，不過暫時無得賣，淨係送畀雞排妹。
「雞排號」採用Q版造型，並首次設有駕駛席，依家贏夠288場即可免費取得！
「世界BOSS關卡」將於本月底加入新大佬雞排妹，贏到佢就有特別版「雞排號」！
畫面採用Unity 3D技術來呈現，四驅車外形同軌道擬真度好高。
新功能「四車同行」容許四車同時比賽，競爭比一對一激烈得多！
提供不同特色嘅超大型軌道，並設有排名榜讓大家競逐。
想贏一定要Tune車，遊戲提供過千件零件，安裝後仲會反映喺外觀上。
IAP元素當然少不了，電池、特殊零件都可用真金白銀購買。
勝出比賽可抽零件一次，抽唔抽到好嘢就睇你手氣喇！
《爆走四驅》
雞排妹現場試玩新關卡，大讚畫面流暢逼真。
比賽時要出五張球員卡，作用各不同，合理組合可提升默契度。
球員卡各有等級，並設有裝備、力量、速度及靈活等多項屬性。
收錄原裝動畫及配樂，不過唔係廣東話配音就爭咗啲親切感。
設有故事模式，玩家可陪住櫻木由新仔打到全國大賽，好感動！
球員卡共有六個稀有度，六星係激罕，大猩猩赤木係其中之一。
《灌籃高手》
畫面改為橫向推進，並附有中文劇情，毋須再好似以前睇日文字幕咁靠估。
設有不同關卡，難度就有「普通」及「困難」兩級選擇。
裝備、戰鬥力皆可升級，人物外形仲可以改，給老玩家新鮮感。
人氣角色如二階堂紅丸、不知火舞等全部重新繪畫，比以前點陣圖靚好多！
追加更多場景，連帶舞台面積亦變得更廣闊。
《KOF97 OL》
可使用超過100多種特殊射球，並沿用街機時代的搖桿操作。
畫面沿用點陣圖處理，充滿懷舊味道。
可合成必殺技，考驗玩家創造力。
遊戲玩家可透過藍芽或Wi-Fi與朋友對戰。
完整收錄BGM，部分音樂更屬首度公開！
《熱血高校躲避球》
無線控制 SteelSeries Stratus XL $899（a）
極速叉電 uNu Ultrapak
$599（3,000mAh）、$799（10,000mAh）（b）
夜中照明 Xpower幻彩觸控筆
各$99（a）
Kali
Mario
男生砌餐飽《爆走四驅》
四驅車最近有翻Hit之勢，車會開完一間又一間。有香港手機遊戲開發商就睇中呢個熱潮，推出手機遊戲《爆走四驅》，仲請來「雞排妹」鄭家純做代言人。遊戲採用Unity 3D技術呈現出全3D細膩畫面，並加入「即時運算物理引擎」，車輛馬力、加速、過彎等數據全由程式計算，以模擬最逼真嘅比賽狀況。小記試玩，就發覺四驅車嘅外形、速度同碰撞反應都好真，而且比賽設有手動模式，容許玩家自行加減速，比玩真四驅車參與度更高。遊戲另設有多個視點，除俯瞰View外，仲提供車尾鏡頭，玩時恍如置身現場一樣。
過千零件供改裝
一如真實玩法，遊戲提供過千款零件讓玩家收集或改裝，由龍頭改尾，到摩打、齒輪、側輪、中軸及輪胎都有得改，玩家們要根據軌道類型Tune車，例如高速軌講求速度，技術軌則講求穩定等等，否則一味將「極速」值嘅零件擺埋一齊，最終只會飛出街收場！貴為主角，四驅車暫時有數十款選擇，全部特性唔同；代言人雞排妹嘅「雞排號」更會於遊戲內出現，玩家們只要勝出288場比賽即可免費獲得，而特別版則於本月尾開放的嘅「雞排BOSS關卡」內，以獎品形式送畀玩家，想攞就要勤力操車。
模式方面，現階段設有「聯賽模式」、「日限TA模式」、「世界BOSS關卡」及「緊急TA賽」等，另外還可以參加「WGP世界杯」，跟其他網絡高手爭奪世界最高榮譽。開發單位補充，遊戲將於本月底追加更多內容，例如「四車同行」功能支援最多四車同時比賽，比目前「1 vs 1」更刺激、更考戰略。另外，大家引頸以待嘅公會功能亦即將開放，屆時玩家就可跟志同道合自組車隊出戰，大玩PK賽，喺各賽道排行榜一爭高下！
INFO
適用平台：Android 2.2或以上、iOS 5.1或以上
檔案大小：83MB（Android）、108MB（iOS）
軟件售價：免費
網址：4wd.monster-inc.com
入樽睇動畫《灌籃高手》
香港男生係飲《Slam Dunk》奶水長大，雖然連載已經完結十多年，但嗰份精神依然長存漫畫迷心中。原作者井上雄彥至今都唔肯畫第二部，幸好手機遊戲可幫我們重拾經典。《灌籃高手》係目前唯一獲得日本東映動畫正版授權嘅手機遊戲，亦係首款遊戲使用「Animation Mix」技術，將原裝動畫入面嘅劇情、場景、人物及主題曲原汁原味融入遊戲之中，而且所有對白均設配音，讓大家回味作品中多場經典賽事。
卡牌對戰組合球員
遊戲基本玩法係卡牌對戰，當中有過百款球員卡可自由組合，湘北、陵南、海南、翔陽等熟悉臉孔，例如流川楓、仙道彰、藤真健司等都可選擇使用。比賽時雙方各出五張球員卡，當中分為進攻及防守類，進攻卡士氣滿時可發動攻擊，而防守卡士氣滿時則可阻擋對方，勝出比賽就有機會再抽卡。遊戲升級元素豐富，裝備、力量、速度及靈活性皆可「升呢」，有心玩的話，櫻木都可由新仔變高手！
INFO
適用平台：Android 2.2或以上、iOS 5.1.1或以上
檔案大小：41MB（Android）、149MB（iOS）
軟件售價：免費
網址：sd.mobage.tw
經典再挑機《KOF97 OL》
男生打機有邊個未玩過《拳皇》系列？當中最為人所津津樂道嘅，首選係《拳皇97》，可任意使出各種超必同防守反技，可以話係集前三代大成。全新手機遊戲《KOF97 OL》就向經典致敬，佢由日本SNK正式授權監修，舊作中所有角色如草薙京、八神奄、泰利及不知火舞等都會粉墨登場，只不過如今重新繪畫製作，以全新面孔同各位玩家見面。遊戲BGM及對白將以原音重現，玩家如小記聽到開場音樂就整個發軟，舊玩家一定感動。
連擊駁招依然爽快
受手機屏幕尺寸所限，玩法自然有所改變，例如畫面改為橫向推進，並取消傳統拳腳掣，改為五個技能掣及一個攻擊掣，雖然以往「下前下前拳」等「屈機」招未必再出到，但以上按鍵混合使用一樣可連擊及駁招，爽快感依然！當然傳統嘅對戰模式，喺部分BOSS關卡中都有保留，而且舞台面積更廣闊，比以前更襟玩！遊戲暫時仍處於公測階段，ipa安裝檔已經可以喺網上搵到，想率先試玩的話不妨搵搵！
INFO
適用平台：iOS
檔案大小：45.84MB
軟件售價：免費
網址：kof.wanmei.com
原班新製作《熱血高校躲避球》
《熱血高校躲避球》係街機及紅白機大熱遊戲，有別於《熱血硬派》純打鬥玩法，呢款純運動遊戲以誇張動作及Q版人物見稱，不少愛打機嘅男生都沉迷過！呢款《熱血高校躲避球ALLSTARS!!》（原名︰くにおくんの熱血ドッジボール ALLSTARS!!）由當年原班人馬製作，各位熟悉嘅角色，如國雄、阿力等都會登場，畫面則沿用點陣圖呈現，加上當時嘅BGM及關卡，叫人懷念。
僅限日本帳戶「單撈」
遊戲玩家可透過Wi-Fi與朋友對戰，當中必殺射球多達100種以上，堅果射球、上鈎射球、下墜射球、瞬移射球等全部用得番，部分必殺技更可透過組合來創造，絕對考驗玩家嘅原創能力。遊戲現已於日本App Store上架，Android版預計今年夏季上市，前者費用全免，但「單撈」首要有日本帳戶，而且入面唔少道具都要付費購買，想玩得叻就要使啲錢。
INFO
適用平台：iOS 6.1
檔案大小：53.6MB
軟件售價：免費
網址：www.marv.jp/product/kuniodb
手遊補品
想打機打得叻，除咗講技術經驗之外，相關配件都好重要，即睇以下幾件手遊補品啦！
無線控制 SteelSeries Stratus XL
支援大部分熱門手機遊戲，並採用玩家熟悉嘅搖桿及肩部按鈕設計，大幅提升操控靈活性，續航能力更長達10小時，夠長氣！
$899（a）
極速叉電 uNu Ultrapak
打機最怕手機無電，呢款「尿袋」有兩款容積，並支援Ultra-X快速充電，15分鐘即能回復70%電量，大大縮短等候時間。
$599（3,000mAh）、$799（10,000mAh）（b）
夜中照明 Xpower幻彩觸控筆
內置四色LED，黑暗中打機補光不刺眼，手握部分則採用鋁合金物料製造，耐用兼有助減輕疲勞感。
各$99（a）
專訪資深機迷Kali 打槍Game未必啱
手遊近年湧現復刻潮，問到本地資深女機迷Kali有何遊戲想在手機重玩，佢話︰「手機始終屏幕細啲，速度又無咁快，我打開嘅槍Game就算重出都未必好玩，所以我會揀模擬遊戲或方塊遊戲，好似《Theme Park》、《Sims》及《瘋狂醫院》，一來圖像簡單啲，二來可用番篤芒操作，較適合手機平台。至於玩法，個人覺得加鹽加醋反而唔好，最好係畫面同玩法都跟番舊作，有嗰份原始味道先珍貴！」
任天堂面對現實
手遊市場非常龐大，就算是遲遲未肯投入市場的任天堂，日前也宣布跟日本手機遊戲開發商DeNA合作，使用任天堂的知識產權來開發手機遊戲。據知遊戲將不會直接從現時的Wii U或3DS上移植過來，而是以全新方式出現，屆時大家就可在手機玩到Mario及薩爾達傳說。
查詢
（a）2708 8198、（b）2768 7009
Gilbert
