12PM Figure召集虎．兔打頭陣

桂正和負責人設嘅英雄動畫《Tiger & Bunny》，細比例Figure SHF，以及人物模型MGF都賣個滿堂紅，殊不知Bandai仲有後着，趁住早前在港舉行「Tamashii Feature's Vol.4」之時，全球首度發表新Line—12PM（12" Perfect Model），顧名思義進軍12吋Figure市場，而且唔只用「虎兔」打頭陣，同場仲Show埋跟Sideshow跨界合作嘅《Star Wars》C-3PO及R2-D2 1/6合金Figure，睇嚟Bandai對12PM有好大期望喎！

黃浩然吼實C-3PO

其他廠商嘅12吋Figure，主攻雕工細節，不過12PM嘅Wild Tiger大可視為SHF及MGF嘅放大版本，素體及關節用咗大量多重及延伸關節，骨架就用Diecast炮製，可動性及耐玩性都相當高。現場所見Wild Tiger備有男主角虎徹嘅面相換件、Wild Shoot配件、動畫版及劇場版兩款左肩甲贊助商標誌，以及多款造型手掌，最驚喜係額頭、雙眼以至全身20個地方內置LED，重現劇中發動「Hundred Power」時全身發光嘅效果。同場亦Show埋Bunny嘅試作品，完成度同樣咁高，不過未見佢哋各自嘅「Good Luck Mode」武器，唔知係未做得切，定係預留喺魂Shop分售。

發布會嘅另一Suprise位，係黃浩然忽然現身做星級嘉賓，好戲之餘，原來佢都係一名玩具迷，雖然佢本人仲未追睇《Tiger & Bunny》，不過接觸過12PM嘅Wild Tiger後，都大讚發光設計夠噱頭，而且十分期待接力推出嘅C-3PO，佢話：「現場睇嘅試版，已經用咗大量Diecast製造，用料好足，加埋金色電鍍閃令令，肚位嘅電線Detail亦都好精密，手肘又有連動機關，好大機會一推出就要即刻入手！」

SHF拉打陸續有來

PM會唔會受埋幪面超人玩？相信Bandai都未有Decision住，不過下半年排期推出嘅SHF拉打Figure，就喺今次Tamashii Feature's提早現身，當中包括臨近大結局嘅Fourze最終形態，全身做足銀藍色塗裝外，當然唔少得由火箭變成嘅Barisan Sword。除咗新角色，SHF亦會向經典致敬，當中包括平成年代嘅《龍騎》Knight Survive，以及昭和年代嘅Super 1。

至萌戰隊參上

除咗《Tiger & Bunny》及《Star Wars》之外，原來PM已經預埋《非公認戰隊》嘅秋葉紅一份，現場所見又真係幾型仔，起碼比SHF版本大咗成倍都唔止，自然更有氣勢。不過講到最吸引嘅「非公認」展品，其實係機械人Itashar Robo，拍埋SHF一齊，比例啱啱好，事關佢可以變做「痛車」Machine Itashar，而且無論變身前後，戰隊嘅三位成員都可以坐到落去，夠晒Gimmick。同場仲Show埋變身器MMZ-01「萌萌槍手」，比例睇落似係實物原大，亦都跟足原著一樣，可以由萌系女生Figure變成戰隊成員嘅佩槍，「非公認」粉絲預定下半年銀包乾塘啦！

Robot魂虎虎生威

論吸金能力，Robot魂同SHF不遑多讓，今次大Show又點會少咗佢嗰份？早前推出嘅Robot魂龍王丸叫好又叫座，佢嘅好對手邪虎丸亦將會食住上，同龍王丸一樣，唔只識變形，仲送埋駕駛者虎王，之前買落龍王丸嘅粉絲，又點可以唔湊齊一對？講到一對，今年四月推出咗RX-93 New Gundam，佢嘅宿敵MSN-04 Sazabi亦會喺下月上架，浮游炮全開呢一招當然唔少得。

SR合金瞄準80後

超合金係Bandai嘅台柱商品，除咗早前介紹過、將於年尾推出嘅DX超合金魂鐵甲萬能俠，SR合金亦都愈出愈有，題材仲合晒80後「合尺」，9月就有恐龍戰隊《Power Ranger》，現場所見關節位做到足，相信可動性唔會令人失望；至於10月嘅Aquarion EVOL亦一樣精彩，背翼嘅複雜拉花拍得住之前嘅Solar Aquarion，《創聖大天使》嘅粉絲點可以Miss！