Fundman睇市：領匯食息諗得過

事實上，一二年開始，年年都估美國加息，狼來了故事講多都開始無咁多人信，君可見，早排美國議息，十年美債孳息卻係級級落，前晚撻落1.87厘，同月初高位2.26厘愈走愈遠，反映金融市場認定美息加極有個譜。

更長年期的三十年債息，依家得2.46厘，有趨勢向住年初歷史低位2.22厘進發。本來美國經濟復甦還過得去，但歐、日央行狂印錢，熱錢狂湧向美元資產，美金大幅升值又拖番美國經濟後腿，講到底，全球經濟一體化，問題亦要共同承擔，累鬥累的惡性循環已經形成。

趁低息期未有耐講拜拜，領匯（00823）出去搵嘢買，今次收購跨境進行，由南豐手上買入北京中關村的北歐美匯購物中心（EC Mall），作價25億元人民幣，相當於31.2億港元。

美債息維持低位

中關村被譽為中國硅谷，相關購物中心毗鄰有不少高科技公司辦事處及高級學府，出租率為99%，目標客戶係白領及大學生等高消費中產，今、明兩年商場有約三分一租約到期。不過，近一年內地零售市道麻麻，恐怕項目未必做到過去兩年平均每年加租一成五的光景。

商場○九年才落成，項目短期應該唔使太花錢去做提升工程，除稅後的淨回報大約4厘，如果短期無太大空間做提升及加租，對大部分房地產信託基金嚟講，收購未必對營收有幫助。

不過，領匯貴為城中估值最高的REITs龍頭，又唔同咁講法，事關進身藍籌後，領匯本身融資成本確係比其他行家便宜，最近發隻七年債只係3.2厘，借3.2厘買4厘，意味今次可以做到即買即賺到息差，對每單位派送（DPU）有輕微的好處。

掉轉頭睇，內地個人遊消費同人數都無驚喜，今年香港商舖租金壓力漸見，尚幸領匯的屋邨商場所受影響較輕微，現價48元，預期一五年派息3.77厘，如果美債息繼續停留在1.8厘甚至更低，有2厘息差的領匯諗得過。

瑞聲撈底咪心急

業績期真係頭都大，公布上市後首份倒退成績表的瑞聲科技（02018），股價一隊就一成，收報48.2元，去年純利跌10%，至23.18億元人民幣，撇除一次項目，實際經常性盈利有2.8%增長，不過以一隻18.5倍PE的高估值工業股而言，單位數增長，市場唔多接受之外，毛利率回落都係一大礙眼之處。年初炒iPhone 6帶起第四季業績，由40元起步升咗唔少，尋日低位45.55元雖然有唔錯支持，但都係等守得住兼靜番三兩個月時間至諗。