Fundman睇市：聯通值得追落後

長期對中國口淡淡，預言經濟遲早撞板的諾貝爾經濟學獎得主克魯格曼（Paul Krugman），日前出席亞洲金融論壇，繼續佢淡友作風，笑中國GDP數字水份多，猶如科幻小說一樣咁虛幻。老實講，投資市場真係無幾多人，會把祖國經濟數據信到十足十，單係睇彰顯國力的四大銀行股，全部單位數PE，只及國際同業平均一半左右，反映賓架老早將中資股，好似歲晚大平賣咁打個五折。

內地經濟唔對路

到底中國GDP數字有幾多水分存在，我等普羅投資者實在無法得知，只不過，由其他灌水誘因較低的數字，都可以睇到祖國今次經濟調整有幾嚴重，國統局網絡話，舊年全國六千瓦以上電廠發電設備，平均利用時數4,286小時，創下三十六年新低，按年減少235小時，全國發電量按年增長只得3.2%，比次按風暴逼到阿爺要出到4萬億救市的○八年的5.6%，更為疲弱。

姑勿論點都好，依家股市流行掉轉嚟炒，實體經濟愈糟糕，即係中央與人行出手救經濟的誘因愈大，可以睇番上周末中證監言之鑿鑿，話要懲處個別違規向散戶融資嘅券商，搞出個「一一九」股災，話口未完，收市幾間外資行已經出嚟唱反調，瑞銀話打壓提供入市良機，美銀美林更估計中證監出手為人行降準鋪路，兩三個星期內會出招。

滬指上望3500

昨滬綜指大升4.7%或者150點，收3,323點，成交額仲要創埋一月以來最多，可見等入市的投資者多過等食胡的一大截，如果真係一月尾二月頭降準，睇怕滬綜指短期挑戰3,500點關口，唔會太令人意外。以A股為馬首是瞻的港股，反彈401點，收24,352點，主板成交又再回到四位數字。

內地三間電訊商先後公布上月上客數字，基本上延續下半年強勢，中移（00941）新增4G客1,883萬戶，再創單月新高，累計去到9,006萬戶，聯通（00762）3G及4G用戶淨增加115.3萬戶，兩者合併數字去到1.49億。讀者都知，今年筆者對於內地手機生產有相當大戒心，由小米帶頭的「頂爛市」智能手機戰，有愈演愈烈迹象，小米嗰頭減價一舊水，以699人仔推紅米2，轉頭聯想（00992）話出部規格相近的樂檬K3，賣599人仔，無上市的華為更加推部399人仔。

要知一四年初內地4G手機仲賣緊三、四千人仔，依家十分一價錢可以出機，你話邊個最着數？除用家外，肯定係網絡供應商，去年下半年中移、聯通等的手機補貼費，已見到有幾着數。

尋日中移進身紅底股，以股論股，聯通其實唔執輸，建立鐵塔公司對佢好處又比較大，現股價12.02元，同舊年九月高位14.22元仲有一段距離，實在落後得有點過分。瑞信啱啱出報告，比聯通跑贏大市評級，睇18.85元，打個九折，17元應該唔算奢望，尤其見資金開始狂掃中移，相信遲早水向低流，一於睇實隻聯通。