股海實戰：航天控股上望1.2元

國務院廢除養老金雙軌制，消息刺激內險股飆升，並帶動滬綜指升114點，收報3,336點，至於在港上市的內險股，同樣成為市場焦點，平保（02318）、國壽（02628）及太保（02601）均升逾3%。至於首日掛牌的泰加保險（06161），雖然公司主要在香港經營小巴及的士保險，同國務院廢除養老金雙軌制無乜關係，但受惠於整體市場氣氛配合，收市較招股價升三成。

大市氣氛未算好

大市尋日升二百幾點，但係主板下跌股票有700隻，比升的582隻仲要多。阿莊發現有個別之前跌得殘的細價股，尋日走勢唔錯，好似隻財訊傳媒（00205），由1元樓上跌到只得3毫幾，整固一排之後，尋日有返少少鍋氣，但阿莊覺得呢啲細價股，背後無古仔或利好消息配合，升勢好難維持，所以如果跟進的話，宜見好就收。

尋日隻航天控股（00031）亦隨大市做好，成功突破1元關，最後以全日高位1.04元收市，升8.33%。自從軍工股熱炒，航天控股亦成炒家追捧對象。上月有報道指軍工科研院所已就改制政策達成共識，除最核心軍品研發機構之外，其他軍工科研院所改制上市，在理論上沒有實質障礙，料將加速推進。

業績表現有交代

從目前來看，中航工業、中船重工、航天科工等軍工集團態度最為積極，市場憧憬航天控股可受惠母公司加快進行重組，故不時有炒作。截至去年六月底止，航天控股錄得營業額12.58億元，按年增加8.8%，純利雖然減少76%至8,793萬元，但若撇除一三年度一次性非經常性收益，實際業績表現其實不俗，加上集團去年成功出售物業，似乎是為系內重組作部署。

航天控股昨日走勢對辦，成功突破由去年十月延伸的下降阻力，估計股價有力再上，目標挑戰1.2元，如今日股價喺1元附近水平，阿莊會買入10萬股，上望1.2元，下面跌穿0.9元止蝕。