魚缸Blogger：五洲國際小注跟炒

今年五洲國際（01369）積極擴充業務，大搞商業物流園，三月推介時仲係得嗰個半，尋日股價狂飆14.7%，以接近全日高位1.79元收市，守住尋日平均價1.7元可小注跟炒，阻力睇1.9元。

五洲從事物業發展、投資及管理服務，以「五洲國際」及「哥倫布」品牌，發展及運營專業批發市場同多功能商業綜合體。今年頭五個月實現合約銷售金額17.1億元（人民幣．下同），比去年同期增長26.2%，雖然比起一至四月嘅增長係有啲失色，不過以依家內地調控環境嚟講算唔錯。

公司去年多賺46%，至10.2億元，全年實現合約銷售金額51.8億元，按年增長87.7%，毛利率由53.3%降至43.7%，負債比率由90.6%降至59.8%。另外，繼三月投資溫洲市城市交通樞紐商業設施後，上月五洲同普洛斯中國訂立戰略合作框架協議，將建立物流及儲存平台，配合普洛斯於管理物流儲存設施的專業，發揮協同效應。