樓市出更：樓上舖海鮮價摸貨勁賺

舖位炒風蔓延到樓上細價商場舖；旺角好景商場近月連錄多宗摸貨成交，有市場消息話，個別舖位摸貨一個多月勁賺215萬元，難怪跟住繼續有摸貨經拍賣行放售，部分開價更比購入價高出超過40%；另外，深水埗金盟大廈時尚廣場三樓，本月亦有兩個購入僅兩個多月嘅舖位，由同一投資者以每個29萬元摸貨形式放售。

劉Sir同代理老友傾開，話依家舖位做價愈賣愈貴，投資者亦紛紛轉炒樓上細價商舖，好似以電腦遊戲同相關配件商戶為主嘅好景商場，今年首七個月已錄到十多宗舖位成交，唔少仲係透過拍賣場摸出。

早排好景商場一樓就有個雙號舖位，以130萬元透過拍賣摸出，比開價105萬元搶高約24%，睇番土地註冊處資料，個舖上手業主喺五月份以125萬元買入，兩個多月升值約4%。

拍賣開價嗌高逾40%

好似日前又傳出一個同層相連舖，一口氣以835萬元摸出，原業主持貨一個多月摸出勁賺約215萬元，大幅升值35%；另一個同層單號舖位，喺五月份以240萬元易手，按建築面積大約87方呎計，呎價達約2.76萬元，之後一個月即以250萬元摸走，呎價升至約2.87萬元。

嚟緊呢個商場一樓有個雙號舖透過環亞拍賣行推出，實用面積約55方呎，建築面積約98方呎，拍賣開價達268萬元，睇番資料，原業主持貨只有個幾月，買入價只係190萬元，即係開價已經叫高41%。

深水埗兩舖每個29萬放

另深水埗金盟大廈時尚廣場三樓，本月下旬亦有兩個曾經拍賣嘅舖位摸貨，透過另一間拍賣行再推出，兩個舖位建築面積同樣約200方呎，各以29萬元開價再拍，分別比之前調減10萬元吸客，據土地註冊處資料，呢兩個舖位同時喺今年五月底由同一買家購入。

樓上商舖炒風不斷，環亞拍賣行曾傑俊話，近排佢哋拍賣行一個月都有十幾宗成交，大約三份一係舖位，絕大部分都係樓上商場舖。