Fundman睇市：內地股市短期難樂觀

英國、意大利兩大足球強國，怕輸選擇Hea住踢，將最終結局交畀命運女神去決定，唔係每個股民都係球迷，但似乎都從歐國盃中得到啟發，大家實行唔做唔錯等運到，尋日恒指跌97點，報18,897點，港股主板成交縮至374億，創近四星期新低，樂觀的投資者還期待周四歐盟峰會會有奇迹出現，可以解決所有經濟難題，但只怕癡心錯付，沉悶缺乏方向市況仲會糾纏一段日子。

內地股市令人憂慮，人行三年來首次減息的刺激，經已煙消雲散，昨日滬綜指跌至近半年低位，成分股中以資源股最弱，平均跌幅3.5%。工業及出口需求減少，煤炭價格一星內期罕有地急挫近3%，成為被沽售的導火線。值得留意，A股收市指數2,224點，跌穿三月底低位2,242點的雙頂頸線支持。

滬綜指一二年平均市盈率跌至9.7倍，與歷史低位十分接近，可惜樓價死灰復燃依然是中央一大憂慮，年內人行減息、減存備金率的空間未必太大，大行估計只有一次四分一厘減息，0.5至1%的存備金減幅。外圍不穩，拖累內地經濟持續放緩，抵銷了財政政策逐步由緊轉鬆的好處，或者今日A股十分接近中期的低位，但跌穿2,242點重要關口之後，下一個可見的支持區，會在年初低位2,132至2,200點之間。

今個星期香港進入回歸十五周年，國家主席胡錦濤到訪成為全城焦點。港人對現政府施政怨氣不絕，魚缸中人都猜測領導人來港前，好有機會先透過送禮平息民怨。無奈即使港股直通車放行，以目前內地股市估值還要比港股便宜的客觀因素，相信○七年誤以為開車，5,000億元襲港炒高恒指見三萬二的盛世，歷史重演的可能性微乎其微。昨日所見，趁回歸前送禮概念炒高的券商、零售及珠寶股，開始無以為繼，以現時內地情況，只怕捧場客希望愈大，失望愈大。

純官進軍倫敦樓市

新世界發展（00017）主席鄭家純，透過私人公司斥資4.5億英鎊，進軍倫敦地產市場，入股位於倫敦東面的Greenwich Peninsula項目六成權益，該沿河長達1.4公里的巨型項目，包括住宅、商用等樓面，毗鄰英國O2體育館，附近也是倫敦新金融區。

唔少歐洲貴族及超級富豪，怕歐元最終難逃解體命運，熱錢湧入信心較高的英鎊停泊。筆者認識幾位老友太太，都話近大半年，倫敦西區尤其豪宅林立的Kensington附近，靚盤幾乎連睇樓機會都無，熱鬧程度，比香港豪宅有過之而無不及。

純官今次重錘出擊Greenwich Peninsula，熟知英國樓市的，會認為風險唔細，以香港為例，情況如同富豪熱炒山頂屋，純官卻狂掃西九龍一樣。不過，有咁上下年資股民應有印象，新世界系非上市投資，往往表現遠勝上市公司，君可見彤叔的周大福（01929）上市前後表現，可知一二。