股海實戰：中旅博反彈毋須心急

雖然近期美股做好，納指更創出十年新高，但港股假前表現差勁，五月期指低水236點。究竟係咪預示「五窮」來臨，股民都開始有點心慌。執筆時聽到美國成功捕殺拉登，美股期貨上升，但呢期港股「獨弱」，所以阿莊都唔敢講今日港股會唔會大挾淡倉，總之若本周市況未有明顯改善，投資者宜考慮減倉。

上周阿莊話等業績定去留嘅農行（01288），業績雖好，但股價高位沽壓沉重，上周五遂以平均價每股4.67元沽出手持嘅15萬股，利潤約1.7萬元。另外，復活假前兩日推介過嘅中芯國際（00981），上周五逆市升7.69%，收報0.7元，料本月十九日公布首季度業績前隻股仲有得去。

匯賢不妨長線投資

匯賢產業（87001）上周五首日掛牌收報4.75元人民幣，較招股價低9%，主要受大市利淡影響。查實呢隻以人仔計價嘅房地產信託基金，係讓收息一族長揸博賺價兼賺息，若然以為可以短炒圖利，未免搵錯對象！

政府上周公布招標章程、位於紅磡嘅兩幅地皮，指定要起細住宅單位，但落實日係五年後嘅事。要知道，起樓唔同做麵包，可以即叫即整！由地皮成交到可以預售樓花，一般最快都要一、兩年，只顧增加遠期供應，既無助當前撲火，更有為日後樓市種下禍根之虞！

阿莊認為政府宜設法提高投機炒賣嘅成本，並考慮復建居屋，加快活化居屋及推動市區重建，確保有渠道上車，香港樓市可自行調節；若處理不當，土地供應政策落入「時差」陷阱，若利息回揚，又或係A股牛氣再現引發陸資撤出，咁樓市就危危乎！

發展步伐可望加快

個股方面，上周見到紅籌股華潤電力（00836）宣布，由宋林接替王帥廷出任公司主席，而王氏將出任香港中旅集團行政總裁。資料顯示，去年七月宋林才辭任潤電主席，由當時任總裁嘅王氏接任，如今宋林再度出山，據講係要顯示母公司重視潤電嘅發展，特別係目前火電業務發展嚴峻，且急切需要緊跟國策加快拓展新能源業務。

至於王氏，潤電上市後一直出任主帥，期間公司成績斐然，聽講今次獲調派至香港中旅集團出任行政總裁，相信係國家用人唯才嘅安排。事實上，中央近年多番強調要拓展旅遊業，但偏偏呢家龍頭企業經營表現如「拉牛上樹」，旗下在港掛牌嘅中旅（00308）業績未盡人意，股價表現更落後其他大型紅籌，長情股東真係有苦自知！

中旅上周五收報1.59元，跌1.24%，市盈率五十八倍，市帳率0.76倍。如今母公司喜獲管理精英加盟，希望亦有助中旅加快發展步伐，配合產業政策發展，更好地體現其旅遊資產價值。不過，喺任何重組消息出現前，策略只宜待極度超賣嘅情況下才出手入市博反彈。

戰報

保利協鑫（03800）

史提芬上周三推介嘅保利協鑫上周五再創新高5.56元，以推介日低位4.93元計，短線食胡已賺近13%。

鐵貨（01029）

志強上月二十日睇中隻鐵貨，跟佢於當日低位2.14元上車，至上周五高位2.34元食胡，升逾9%。