王帥廷過檔中旅
尋日華潤電力（00836）宣布主席王帥廷辭任公司執董、董事會主席等職務，由集團董事長宋林重掌所有職務，即日起生效。
宋林重掌潤電
咁王總究竟會去邊呢？佢好大方咁開咗個記者會話畀大家知，佢會獲中央任命出任香港中旅集團行政總裁，喺五一勞動節假後返工。
中旅集團為央企之一，係旅遊業嘅龍頭，王總職務相當於副部級，照咁講即係升職啦。太子尋日問佢要離開有咩感覺時，佢答話「很高興」啦。
王總原本喺政府做事，九四年華潤集團投資興建第一個電力項目——徐州電廠，佢就入咗去做廠長，業務愈做愈大。後來佢拎住一個行李篋，咁就嚟咗香港華潤總部幫手，一做十幾年。佢話當時好唔慣香港生活，又離鄉背井孤伶伶一個人咁。到依家公司終於上咗軌道，仲入埋藍籌股，聽落真係唔容易。佢話家陣屋企已有「好幾個行李箱」。
佢又總結喺潤電嘅工作，話自己「好滿意」，但都好遺憾現時被調走，事關如果再畀時間佢，佢會做得更好。
