王晶寸擦鞋阿叻插主僕不分

王晶日前寸爆港姐「水平糕」而與老友陳百祥（阿叻）爆罵戰，昨日王晶繼續踩今年港姐面目模糊 ，又指阿叻「唔使擦鞋擦到咁盡」！阿叻立即「着晒」，反寸他主僕不分！

王晶昨日出席新任「晶女郎」童菲寫真集記者會，提到因狂踩今屆港姐而與阿叻互寸，日前他寸爆港姐應全部淘汰，被阿叻揶揄疑患白內障！王晶昨日反擊指好友對阿叻的言論已感麻木：「唔使理佢！（阿叻話你公司老闆陳國強有份搞港姐選舉，勸你唔好亂噏？）唔使擦鞋擦到咁盡嘅！（陳國強有冇叫你唔好講咁多？）佢係其中一位投資者，亦係我好朋友，冇講任何嘢！」

曾跟前退選港姐邱淑貞傳緋聞的王晶，揚言當今除了何守信外，冇人敢質疑他對港姐的熟悉程度。對於今屆港姐，王晶繼續狂踩：「記唔到個樣，好難紅，成班人一樣樣！有印象都只係湯鎮宗個女（湯洛雯），不過十個企喺度就搵唔到！（叫無綫唔好再選？）睇節目策略，我只係觀眾畀意見，當我維園阿伯！」

辣埋「晶女郎」孟瑤

對於被王晶插擦鞋，阿叻昨日接受電話訪問時勞氣地說：「陳國強係我前生意拍檔，依家係佢老闆，叫佢分清楚，我都唔使撈，使擦鞋？傻吓，傻吓！叫佢諗吓邊個要返內地撈啦！佢係咁講港姐，咁佢又捧紅過邊個呀？唔係話畀我聽孟瑤（王晶愛將）紅嘛？佢拍電影都要用無綫啲女仔，叫佢飲水思源啦！」至於候選佳麗王舒銳於港姐Fansbook中，呼籲大家享受參選過程，曾大爆湯洛雯「唔執嘢」的李渼琦則留言指「做愛做的事」，認真坦白！