人氣組合AKB48成功俘虜不少宅男，證明大堆頭的美少女組合確實有市場，本港有模特兒公司有意倣效，並找來30位平均年齡約20歲的美少女，組成「Maid30」攻港。
日前她們以可愛的女僕造型，齊齊殺入旺角鬧市派傳單，宣傳Facebook的「德州撲克派」遊戲。眾女齊齊Chok樣擺出「卡娃兒」（Kawaii）表情，成功引起宅男及龍友注意，不少男士還自備私伙攝影器材喪影，場面一度混亂！
成為龍友目標
當中幾位美少女的外形省鏡甜美，成功率先彈出，包括「長髮梁詠琪」Crystal Lau、「甜版陳美詩」LuLu Tung、「翻版江若琳」Crystal Law、「翻版高海寧」Rain Wong及「混血官恩娜」Mangie Lo，成為龍友的喪影目標。
問到會否擔心於混亂間遭「鹹豬手」？她們淡定地說：「都唔怕嘅，雖然途人好多，不過我哋有工作人員睇實，而且我哋會用傳單護胸！（擔心走光？）唔會呀！做足打底措施喇！」LuLu表示當日派傳單派了一個半小時：「嗰日係首次為呢個遊戲派傳單，場面有啲亂，加上閃光燈閃到爆，好誇張！（你最省鏡喎？）唔係，各有各優點！」
「Maid30」以青春的女僕造型殺入旺角宣傳，人多勢眾！
「長髮梁詠琪」Crystal Lau恍如初出道的梁詠琪，相當清新。
「混血官恩娜」Mangie Lo笑容迷人，成功突圍。
「翻版江若琳」Crystal Law雙眼大大，電死人咩！
「甜版陳美詩」LuLu Tung笑容可親，迷死宅男。
「翻版高海寧」Rain Wong叉起纖腰，一副戰鬥格。