牛口男絕對筍盤
雙唇豐厚而凸出，相書稱為「牛口」，擁有如此嘴形嘅男士，外形上真係唔討好，但大多數都係出生自名門望族，而且一世都有貴人幫助，只要勤奮努力，自能名利雙收。表面上佢哋做事粗枝大葉，但有時粗中有細，留意到別人留意唔到嘅事情。
做佢哋女朋友其實幾好，只要唔介意佢哋嘅外表，一生都會幸福快樂。因為呢種男人，做事圓滑，唔會得失人，做人處事，心口如一，絕對唔會一時一樣，而且責任心強，家庭觀念重，只要你成為佢哋生命中嘅女人，就會一生一世咁去愛錫你。
喺房事上咪以為佢哋係工作狂就會冇厘情趣，原來啱啱相反，佢哋不知幾咁知情識趣。正如頭先所講，佢哋做事有時會粗中帶細，經常會有意外驚喜畀到太太，例如送吓花、食吓燭光晚餐、海灘漫步等，太太想唔冧都幾難。雖然個樣係輸蝕少少，但絕對係筍盤嚟o架！