南華巴西外援伊達本月初拿到香港特區護照，來港8年的他終於入籍成為香港人，較為可惜的是拿取護照時間稍遲而錯過港足熱潮，但見慣風浪的「達叔」直言無所謂，仲叫擁南躉等一等，因為他明年將可代表南華參加亞協盃，屆時再看他表演。

每位巴西球員都有個外號，伊達外號為Itaparica，07年加盟南華時為使球迷容易記住，會方取其Ita發音，將他譯成與1982年世界盃巴西球星伊達同名，自此伊達在港一踢8年，多年來3度「上山」，其個人技術及處理罰球的高超能力深受球迷讚賞，近年已隱隱然成為在港「巴西幫」大佬。

巴西踢波被拖糧 成來港搵食契機

伊達出道時踢過巴甲高士路，本來頗有前途，決定來港全因原效力的巴西球會欠薪，他說：「喺巴西踢波最大問題係欠薪，所以好多球員都被迫出國搵食，而我喺香港搵嘅錢同巴西差唔多，所以決定長期留港。」伊達在港8年先後效力南華、天水圍飛馬及東方，期間在南華出出入入，上季第3度上山，不過隨着年紀漸大表現漸走下坡，甚至有球迷批評他經常「揀波踢」。

然而35歲的伊達今季明顯回勇，季前社區盃攻破傑志大門，聯賽對香港飛馬又交出入球及助攻，功架十足，他說：「我嘅速度或者無復當年勇，但技術同經驗係唔會消失嘅，只要保持良好身體狀況，踢多幾年應該冇問題。」伊達的大兒子已經9歲，最近又再添一男丁，未來幾年又要努力搵奶粉錢養家。

留港8年3度上山 達叔選最佳11人

伊達最近放棄巴西籍，領取特區護照做香港人，他說：「如港足需要嘅話我當然樂意出力，今年南華殺入亞協盃8強，我只能夠喺場邊加油，唔可以晉級4強同決賽真係可惜，明年我將可披甲上陣，期望為球隊再創佳績，我哋已經具備攞冠軍嘅能力，希望明年完成呢個目標。」

伊達在港效力最長時間是天水圍飛馬，08至12年長達4季，但在07年、12年及14年3度加盟南華，經歷「少林寺」3個不同時期的變化，「達叔」選出一個集合3個時期的南華最佳11人，他說：「我喺香港遇過好多優秀嘅球員，今次所揀嘅11人陣容，雖然好多球員已經離隊或退役，再冇合作機會，但美好嘅回憶永遠留喺心中。」