一連四日在粉嶺高球場舉行的「2015瑞銀香港高爾夫球公開賽」今晨正式揮桿，世界排名第7的羅斯、第8的德斯汀莊臣、衞冕冠軍漢特同中國高球新星李昊桐即將展開激戰，不過球迷不要忘記還有51歲西班牙名將占文尼斯，這位前屆盟主去年因病落敗，今年強勢回歸有力左右大局。

占文尼斯（左）笑言今次訪港唔會再食海鮮。

每年有去開粉嶺睇打Golf的球迷一定得占文尼斯，這位西班牙好手外號「雪茄占」，一邊打波一邊食雪茄是其最大特色，他是04、07、12及13年四屆盟主，為香港賽事最成功球員之一，去年本來亦是奪標大熱，可惜因肚痛落敗，今年見「雪茄占」精神爽利，將會有好戲睇。「雪茄占」表示：「我的身體狀態ok，去年我因為食海鮮搞到肚痛，今年我唔敢再食海鮮喇，上屆失落錦標，今年我會捲土重來。」

漢特爭取衞冕

上屆占文尼斯肚痛輸波，冠軍落在澳洲球手漢特手上，42歲的漢特在港澳地區表現特別標青，為備戰香港公開賽，漢特上星期已到澳門比賽，並奪得澳門公開賽冠軍，他說：「去年贏出香港賽事，是我職業生涯的轉捩點，今年我在歐巡賽一直保持平穩表現，上星期在澳門獲勝，更令我更有信心在今次賽事與眾多強手一拚。」

為鼓勵更多市民入場觀戰，今日首天賽事免費有得睇，球迷首先在網上登記就可以取得免費門票，每人限取兩張，詳情可瀏覽www.ubshkopen.com。