筍盤出沒注意，林書豪自爆單身！別以為亞洲「籃壇之光」林書豪名成利就又好仔，一定名草有主，J.Lin昨日抵港展開一連兩日訪港行程，接受本報專訪時就自爆仍然「冇女」，並向傳媒公開擇偶條件，首要是切忌貪慕虛榮「咪貪我啲錢」，NBA鑽石王老五開到聲，各位「女瘋迷」，係機會喇！

林書豪坐上鴨靈號準備遊維港。

林瘋吹住海風都咁Chok！

等到頸都長，NBA球星林書豪時隔近3年再度訪港，昨早約11時從成都殺到，繼續展開亞洲之行宣傳活動。出名是虔誠基督徒的J.Lin，自從在NBA「彈起」後風靡萬千女球迷，然而「林瘋」昨晚受訪時卻尷尬地自爆仍然單身，貫徹其怕醜仔作風。

談及擇偶條件，林書豪稱：「作為一個基督徒，我希望另一半唔係追求金錢、名譽同權力，並且與我有相同理念同價值觀，要清楚了解我嘅為人，例如明白我點解要成立基金會。」簡單講句，林書豪要個好女仔，條件夠簡單，想做「瘋嫂」似乎絕非天方夜譚！

細個幻想踢世界盃

林書豪今次訪港，下榻位於九龍的Ritz Carlton酒店，坐落於九龍站上蓋，該站醫務所昨早爆發「新沙士」虛驚，被問到有否擔心「中招」，林書豪即時「面都青埋」地表示：「你唔講我真係唔知，多謝你話我知，我依家有啲不安。」昨日於adidas運動基地輕舒腳頭的J.Lin，又自爆年幼時立志成為職業足球員，更幻想可以出戰世界盃，但及後覺得籃球才是自己杯茶，笑言「變心」皆因籃球得分比足球更多。

怕heavy都要食點心

上次訪港時到尖沙咀食鐵板料理「慶生」的J.Lin，坦言食過翻尋味，但最想食其實是點心，不過職業運動員要注意飲食，「林瘋」深明食點心「太Heavy」，卻依然希望今次香港行能「試一舊」一嘗心願。「Chur足」十幾個鐘，J.Lin昨晚10時左右又再出動，與家人到尖沙咀adidas旗艦店掃貨，果然Fit喎！

林書豪今日行程緊密，晨早自由活動，之後再到中環海濱活動空間，在adidas運動基地與甲一球員交手，下午則到中大主持「成功的再思」分享會，之後就會起程前往台灣，林書豪父母及弟弟一直會全程跟到實力撐。

林書豪今日行程

時間 活動 地點

早上 自由活動

11:00 adidas運動基地活動 中環海濱活動空間

15:00 《成功的再思》分享會 中文大學

21:30 乘CI924航機離港