巫師主將約翰禾爾因左手多處骨折休息3仗後，昨日在Game 5作客鷹隊奇迹復出，上陣37分鐘貢獻15分及7次助攻。惟巫師於完場前1秒被鷹隊中鋒荷福特補籃成功，終以81:82飲恨，總場數落後2:3。西岸方面，「一哥」勇士主場大炒灰熊，史堤芬居里更創出季後賽史上最快百球3分紀錄！

巫師主力禾爾（紅衫）左手受傷都紮住落場。（法新社圖片 ）

勇士王牌居里贏波又破紀錄，睇佢幾得戚！（美聯社圖片 ）

約翰禾爾對鷹隊首仗受傷，經診斷後證實左手有五處非移位性骨折。專家指禾爾應要休養6至8周，若不顧一切上陣比賽，傷患有機會變成移位性骨折。不過，禾爾昨晨進行投射訓練後，表示左手腕雖仍疼痛，但已經消腫，可以紮住上出戰鷹隊，令球隊士氣大振。

居里威水 季後賽最快入百球3分

禾爾帶傷上陣仍交出15分、7次助攻的表現，惟全場貢獻23分及11個籃板的鷹隊中鋒荷福特，於完場前1秒補籃成功，帶領球隊以1分反勝巫師，總場數領先3:2，第6場將於香港時間明早回到巫師主場進行。

（開賽時間：周六早上7:00）

至於西岸4強方面，勇士主場續戰灰熊，王牌射手「咖喱仔」史堤芬居里今仗貢獻18分，全來自外圍投射，其拍檔奇利湯臣就轟入21分，助球隊以98:78大勝對手。「咖喱仔」除了率領勇士取得重要的Game 5勝利，總場數領先3:2外，更以28場比賽造出季後賽史上最快射入100球3分波的紀錄，G6將會回到灰熊主場上演，到時定必再掀起龍爭虎鬥。

（now635台周六早上9:30直播）