「國泰航空/滙豐香港國際七人欖球賽2015」昨於香港大球場開P，今屆賽事分外吸引，連香港首席女飛魚歐鎧淳都入場做PartTime，順道為港隊加油。暫獲一勝一負的香港隊今日在小組最後一場火併排榜首的烏拉圭，「淳淳BB」與全場4萬觀眾打氣下，撐爆主隊不勝無歸！

歐鎧淳首次入場睇七欖就肩負重任。

港隊首日表現麻麻，今日要畀心機喇！

今日焦點賽事

（now634台及now630台周六早上8:55起直播）

歐鎧淳正努力爭取里約奧運入場券，個人專攻100背，以及港隊4X100自由泳接力，昨早上仍有練水，下午卻以另一身份亮相大球場，原來她一直有為欖球總會做兼職，今次獲分派入場睇七欖，為賽事instagram拍攝花絮相片，大家只要輸入hksevens就可以看到她的攝影大作。

歐鎧淳幫欖總影靚相

原來今次是歐鎧淳首次現場睇七欖：「我很羨慕七欖運動員可以在4萬觀眾面前比賽，游水就很少有這麼多人看，其實我一直都想入場，但很難撲飛，今次為欖總做兼職，終於達成心願。」雖然不同項目，但淳淳BB仍希望港隊在七欖賽場上揚威，工作之餘亦全力為港隊打氣。

李卡度：對巴西未瞓醒

被編入外圍賽組別E組的港隊，首仗對巴西甫開賽即被對方達陣，隨後憑華路雲及T麥堅達陣建功，半場領先12:5，可惜下半場防線兩次甩漏，結果以12:17負於巴西。緊接下來的生死戰對墨西哥，港隊放膽搶攻，麥堅兄弟雙雙達陣，加上隊長賀迪、華路雲及華將姚錦成得分，最終港隊打出「爭氣波」贏38:5。

對於港隊首兩仗表現，教練備加力的評價是「一好一壞」：「我見到球員們盡力找尋機會達陣，這是球隊今天出色的一面，至於壞表現則是未能兩戰全勝，最後一場對烏拉圭必須盡全力，否則出線形勢會變得複雜。」

相隔一年再戰七欖的華將李卡度直言，對巴西時似「未瞓醒」，心態上以為必勝，因此大家必須改善的是心態，輸波後遭教練責罵是應該的，往後每場都要付出120%努力。種子組別方面，大熱鬥新西蘭及斐濟都雙雙報捷，新西蘭以26:7大勝蘇格蘭，斐濟則以38:12擊敗薩摩亞。