2015年香港體壇首宗喜事,香港「拳王」結婚喇!職業拳擊生涯15連勝、「港產不敗拳王」曹星如(Rex),平時為人低調又怕醜,估唔到佢連小登科都保持一貫低調作風!

Laam為老公押後度蜜月

Rex尋日喺旺角帝京酒店同拍咗拖5、6年嘅圈外女友Laam拉埋天窗,好多人都係見到有份出席婚宴嘅藝人張繼聰,喺社交網上載一張同Rex夫婦合照先知道呢件喜事,不過點都好,恭喜Rex「大個仔」!

每個成功男人背後,總有一位女人默默支持,Rex都唔例外。雖然Rex每次比賽過後都傷痕纍纍,不過Laam依然力撐愛郎,為拳擊事業打拚。Laam除咗每次喺Rex比賽嗰陣現身支持,佢仲知道老公暫定今年3月挑戰世界拳王,所以願意押後蜜月,等Rex專心準備比賽,名副其實係「貼心老婆」!

至於今次之所以低調舉行婚禮,據聞係因為Rex同家人商量過後,尊重家人嘅意思,而且Rex認為自己唔係藝人,所以唔想太過張揚鋪張,只係邀請親朋好友出席分享喜悅。