「美男」怒炒塞爾維亞，蟬聯世界盃破「衞冕魔咒」！美國男籃昨晨於籃球世界盃決賽，全隊「使出真功夫」瘋狂搶分，最終以129:92狂炒塞爾維亞，輕鬆捧走獎盃、打破從未衞冕世界盃的宿命。今仗攻入全隊最高26分的控衞艾榮，更被選為今屆賽事MVP，威到盡！

獲選為今屆世盃MVP的艾榮（右），賽後不忘大讚隊友，叻仔！（美聯社圖片）

美國雖然在比賽初段因「一眉道人」安東尼戴維斯個犯纏身、一度落後，但很快就站穩陣腳，並把比分拉開，首節完結時已領先14分。「美男」未有因此放慢手腳，在第2節繼續狂轟猛炸，外圍命中率高達5成、成為今戰致勝關鍵。美國早在第3節就已鎖定勝局，最後以37分之差大勝塞爾維亞，首次成功衞冕世界盃，5度成為世界盃冠軍，追平南斯拉夫紀錄。

艾榮膺世盃MVP 喪操迎NBA開鑼

「美男」贏得冠軍後，一班球員在更衣室狂噴香檳、「隊啤」慶祝。今戰貢獻12分、7個籃板的「半獸人」費列特，慶祝之餘不忘反擊外界質疑：「次次聽到美國派B隊打世界盃，真係好似畀人打咗一巴咁。勒邦占士、高比拜仁同杜蘭特冇參加今次世界盃，唔等於我哋贏唔到囉。」

美國控衞艾榮，今戰6次外圍起手全中，成為國家隊奪冠頭號功臣，効力騎士的他除了入選最佳陣容外，更當選賽事MVP，風頭一時無兩。外號「Uncle Drew」的艾榮，奪標後隨即將目光放到10月底開鑼的新季NBA常規賽：「我喺國家隊，係同緊世界上最好嘅球員並肩作戰，我只係做番分內事啫。返到克里夫蘭市後，我會每日努力鍛煉自己，同埋保持自信。」