「港版戴志偉」歐陽耀冲實現歐洲夢！葡甲球會葡萄牙體育會尋日喺官網宣布，正式簽入香港球員歐陽耀冲，呢位25歲中場將會着上89號波衫，寓意佢係89年出世。香港球迷得知喜訊後，唔少人四出撲呢件傳說中嘅「葡體會89波衫」，無奈香港並無代理，粉絲為波衫各出奇謀，包括組網購團，甚至計劃飛去當地探「歐冲」順便入貨！

「歐冲」終於如願喺歐洲落班。（互聯網圖片）

「歐冲」喺fb分享食足3日葡國菜。（互聯網圖片）

連食3日正宗葡菜

歐陽耀冲早前先去荷蘭試腳，之後再去葡萄牙碰運氣，佢嘅努力並冇白費，尋日終於獲葡甲嘅葡萄牙體育會青睞，會方同時簽入33歲嘅維德角球員戴地。「歐冲」除咗要盡快同新隊友建立默契之外，亦要適應葡國生活環境，佢日前仲喺facebook分享同朋友食足3日正宗葡國餐添！

喺「歐冲」之前，對上一個去歐洲搵食嘅香港球員，要追溯至上世紀60年代嘅張子岱，綽號「阿香」嘅佢喺1960年獲當時身兼電台同《英文虎報》球評家嘅麥他維殊推薦，加盟英格蘭頂級聯賽球隊黑池，成為首位効力歐洲頂級聯賽球會嘅華人球員，可惜缺乏上陣機會兼思鄉情切，兩年後就解約返港。

歐陽耀冲登陸葡甲轟動本地球圈，「歐冲」熱潮隨即捲起，球迷四出搜羅葡體會波衫，但由於呢班波唔算太出名，香港並無球衣代理。球迷想同佢「情侶裝」並肩作戰，最直接方法係上網購買，一向有組織球衣網購活動嘅Edwin表示，已聯絡葡體會希望訂購89號波衫，預料反應會非常熱烈。據聞亦有網民打算飛去葡萄牙入貨，有傳每件波衫售價約為20鎊（約260港元）。