離離合合，尼馬同般娜嘅戀情終於告一段落！繼日前有消息指「新比利」用Whatsapp攻勢箍煲失敗後，般娜前日接受巴西環球電視節目《Fantastic》專訪時，向廣大觀眾宣布已經同尼馬分手，不過又強調同呢位巴塞球星嘅感情永遠都唔會變喎！

般娜受訪時親證已經同尼馬掟煲。（互聯網圖片）

祖父逝世返國奔喪 「哨牙蘇」首操被玩

其實「尼般戀」陷危機已經傳咗好耐，佢兩個早排喺西班牙伊維薩島度假嗰陣，有狗仔隊發現般娜提早鬆人返巴西，尼馬就繼續同班朋友Happy，之後仲同名媛Paris Hilton落夜店蒲添！唔少傳媒都揣測般娜頂唔順尼馬身邊咁多女伴，呢位索女受訪時首度承認已經同尼馬掟煲，不過佢亦留有餘地咁話：「我好尊敬佢，對佢嘅愛永遠都唔會變！」

點都好，尼馬都要盡快擺低兒女私情迎接新球季，佢個巴塞新隊友蘇亞雷斯亦喺前晚首度「復工」投入操練。因為祖父Atasildo過身、極可能要返蒙得維的亞奔喪，因而缺席禮拜二對利昂場甘柏盃嘅「哨牙蘇」，心情雖然睇落唔錯，但佢一「開工」就畀人玩，先係恩尼斯達扮被咬，跟住玩猴子搶波環節，碧基仲趁「哨牙蘇」想「的」波嗰陣用手攞走個波，笑到側邊嘅沙維收唔到聲！