高路斯退隊老婆即被踩！德國足總前日正式宣布老牌射手高路斯退出國家隊，唔少隊友都向「Goal老師」致意，德足總直情承諾會搞紀念儀式。偏偏呢個時候「高太」Sylwia畀時裝達人Belle抽水，話佢唔識裝身，明落高路斯面喎！

高路斯唔踢國家隊啫，唔使連佢老婆都即刻唔畀面啩。

德足總承諾搞紀念儀式

喺今夏世盃成為世盃士哥王嘅高路斯，為「日耳曼軍團」征戰13年後決定退出國家隊。德國足總主席尼斯巴赫揚言為佢同拿姆舉行盛大告別儀式，隊友奧斯爾、普多斯基齊齊喺Twitter送上祝福，大讚「Goal老師」係一代傳奇。德軍主帥勒夫亦表明好難再有人做到呢位射手嘅成就。

勢估唔到卸去國家隊光環冇耐，高路斯太太Sylwia即畀Belle抽水，呢位珠寶店Mvintage Jewels顧問彈佢身為WAG扮相平庸，暗寸對方襯唔起老公。佢仲懶威咁做埋形象指導，叫Sylwia戴啲咩手鐲、項鏈、名牌眼鏡等自己睇落sharp啲，似係想抽水博出位多啲囉。