「蘇神」減刑復出抗「J神」！眼見皇馬新援占士洛迪古斯來勢洶洶，巴塞隨即「做嘢」為蘇亞雷斯嘅FIFA禁令上訴至體育仲裁法庭（CAS），結果獲CAS安排「特快聆訊」準備喺8月中宣判「解禁」，意味阿蘇極可能喺首輪西甲復出，挑戰「占士仔」嘅西甲人氣王地位！

巴塞咬人王 蘇亞雷斯。

蘇亞雷斯同烏拉圭足總曾經為禁令向國際足協上訴，不過本月初已遭FIFA上訴委員會駁回，今次巴塞決定由「終極渠道」體育仲裁法庭入手，終於收到好消息！據報CAS嘅消息人士「放風」，法庭雖然同意保留蘇亞雷斯嘅9場國際賽停賽禁令，但4個月嘅「足球禁令」則極有可能獲得減刑，甚至令「蘇神」可以喺8月24日展開嘅西甲開咧戰上陣！

安排「特快聆訊」8月中宣判

更好嘅消息係，體育仲裁法庭已經落實為阿蘇安排「特快聆訊」，準備喺8月第2個禮拜作出裁決，似乎係為咗令「蘇神」盡快解禁，加泰羅尼亞體育法庭主席施奧爾，亦都透過西班牙《體育報》表示贊成減刑：「當令尼馬受傷嘅人（辛尼加）都未受處分，針對蘇亞雷斯嘅判罰絕對係過重同不合理，佢哋（國際足協）咁做係話緊畀全世界知，咬人比撞傷人哋背部更嚴重。」

賣出34.5萬件波衫 J神48小時幫皇馬執3.4億

雖然「蘇神」今次有望僥倖避過一劫，不過烏拉圭總統穆希卡就希望「咬人蘇」可以正視問題，尋求醫療協助：「呢個細路（蘇亞雷斯）心理上係有啲問題，佢細個嗰陣生活太困苦，內心積累太多怨氣，佢應該要搵精神科醫生進行治療。」不過蘇亞雷斯即使解禁，想取代占士洛迪古斯嘅「人氣王」地位並唔易，「占士仔」加盟皇馬短短48小時已經極速賣出超過34.5萬件波衫，為球會帶嚟3,340萬歐元（約3.4億港元）進帳，比加里夫巴利、C朗等初嚟報到嗰陣氣勢更強，「蘇神」真係要加把勁喇！