巴塞買中堅再成笑柄！5年冇買過中堅嘅巴塞落實以2,000萬歐元（約2.1億港元）買入30歲華倫西亞後衞馬菲奧，呢位史上最貴「3張嘢後衞」尋日正式亮相魯營球場。雖然球會高層死撐馬菲奧幫到手，不過有巴粉就嬲到喺維基百科惡搞馬菲奧已經230歲。

巴塞近季中堅入錯貨多

巴塞法國守將撈唔掂

據德國《轉會市場》紀錄，呢單轉會打破咗06年33歲意大利名將簡拿華路以1,150萬歐元（約1.2億港元）加盟皇馬嘅舊紀錄。巴粉見到呢位史上最貴「3張嘢後衞」來投即時躁晒，隨即喺維基網將馬菲奧改做230歲，又話佢「喺1783年10月29號喺拉馬西亞訓練基地出世」，狂寸佢又老又冇用。

難為巴塞總監蘇比沙列特仲死撐：「過咗30歲唔代表球員game over，馬菲奧咁Fit實幫到球隊。」不過巴塞中堅位唔易踢，佢哋近年揼水買人都係得碧基踢得耐，對上嗰位基格連斯基甚至喺1年後極速退貨，馬田卡沙利斯同軒歷基阿祖安奴都未受重用，米列圖又傷多過踢。況且法國守將向來同巴塞又唔夾，白蘭斯、迪侯、基斯坦禾喺巴塞都撈唔掂，得杜林叫好少少。今次巴塞咁樣掟錢落海，又難怪粉絲會躁爆嘅！