皇馬中堅比比近日隨隊去美國為新一季備戰，呢位31歲葡萄牙球員仲特登整咗個新髮型迎接新球季添！不過睇佢個頭成個海膽咁款，真係見到都驚，唔通佢想用新髮型去「攻擊」對手？

聖卡斯歸隊爭正選

唔知係咪想忘記葡萄牙喺世盃分組賽出局嘅傷痛，重新出發，比比特登將成頭鬈毛紮起，整咗個「海膽頭」，核突到爆。綽號「殺人王」嘅佢一向以踢法兇狠見稱，今次整埋呢個「海膽頭」，「殺傷力」即時大增，對手真係要小心啲至得。唔知係咪唔抵得比比個新髮型，度緊假嘅巴塞守將丹尼爾，喺沙灘梳乎時將一大嚿海藻擺上頭，仲影相放上instagram，同比比由場內鍊到場外。

比比隊友卡斯拿斯、沙治奧拉莫斯同莫迪歷亦都到咗美國同皇馬會合，尋日亦有出席球隊操練，「聖卡斯」表現十分落力。梗係啦，因為除咗現時聯賽正選門將迪亞高洛迪古斯之外，仲有傳「銀河艦隊」將會羅致喺世盃表現出色嘅哥斯達黎加門將基羅拿華斯，如果成事嘅話，「聖卡斯」仲有碇企？佢梗係爭取表現，全力爭番個正選位置啦！