世盃射手大執位！智利前鋒阿歷斯山齊士，尋日以4,000萬歐元（約4.2億港元）轉會費由西甲班霸巴塞轉投英超「兵工廠」，咁啱阿仙奴今季換贊助商，「A山」加盟咁大件事，PUMA梗係當正佢係新搖錢樹咁款啦！呢單轉會仲引爆埋「連鎖效應」，有西班牙傳媒計晒數，巴塞賣走A山同法比加斯嘅收入，啱啱好就係蘇亞雷斯嘅身價，尋晚呢單世紀交易亦終於落實，「蘇神」正式宣布空降魯營，英、西聯賽鋒線執晒位，唔知幾時到「紅軍」呢？

蘇亞雷斯尋晚正式過檔巴塞。

文迪蘇傑過馬體會 基拿甸奴投恒大

西班牙《世界體育報》報道，巴塞以4,000萬歐元放「A山」畀阿仙奴，「A山」同「兵工廠」張合約為期4年，周薪達13萬鎊，待遇相當唔錯。查實呢單轉會一早吹到似層層，點解要搞到尋日先落實呢？原來尋日「咁啱」就係PUMA喺泰晤士河水幕，利用投影發布阿仙奴新季波衫嘅「大日子」，「A山」加盟，當然可以令到個場旺上加旺啦！之後PUMA仲即時喺官網將呢位智利Icon嘅新戰衣上架，務求「賺到最盡」！

連埋早前賣走法比加斯，接連掟走兩件主力嘅巴塞，當然要補充新血啦！之前賣法比執3,600萬歐元（約3.8億港元），放「A山」又袋番4,000萬歐元，加加埋埋，咪「咁啱」係7,600歐元，「咁啱」夠找蘇亞雷斯嘅7,500萬歐元（約7.9億港元）條數畀利物浦囉！到咗尋晚，「紅軍」同巴塞官網，都同時宣布「蘇神」已經搞掂晒轉會手續，轉會費一如所料係7,500萬歐元，雙方簽約5年。雖然蘇亞雷斯走人已成定局，但佢都好識做，出咗份聲明去多謝一眾「利迷」多年嚟嘅愛戴。

巴塞做嘢，身為西甲衞冕冠軍嘅馬體會，當然唔可以執輸啦，尋日正式宣布簽入拜仁射手文迪蘇傑，頂替韋拿同「迪哥」離隊嘅空缺。至於冇份入選意大利世盃大軍嘅前鋒基拿甸奴，亦落實以500萬歐元轉會費加盟廣州恒大，疊埋心水去中超掘金。