算死草尹戈爾「打錯算盤」？荷蘭喺8強互射12碼淘汰哥斯達黎加，尹戈爾換入告魯爾嘅神奇調動令人拍案叫絕，不過呢位曼聯新帥昨晨一仗竟然失晒預算，賽後自爆換走尹佩斯後冇人敢射第一個12碼，又搞到冇晒換人名額搵「12碼英雄」告魯爾入嚟救亡，搞到要搵後衞華亞爾頂硬上射第1球，最後咪出事兼出醜囉！

効力曼聯嘅尹佩斯（前）被換走抖抖，令人質疑尹帥徇私。（法新社圖片）

今屆世盃尹戈爾多次作出神級調動，幫荷蘭過完一關又一關，不過今場呢位戰術大師魔法失靈，下半場用咗兩個換人名額都無起色，去到加時5分鐘再換入亨特拉爾頂替隊長尹佩斯。好多球迷都質疑尹帥決定，明知雙方好大機會要互射12碼分勝負，點解要換走12碼高手尹佩斯，同時搞到擅長救12碼嘅告魯爾冇得出場？

用晒名額出唔到告魯爾

更令人搲爆頭嘅係，「橙衣軍團」第1個主射12碼嘅人竟然係後衞華亞爾，結果佢射失埋下輸波伏線，賽後尹帥爆料話：「第一個12碼係好關鍵，點解我安排華亞爾主射？因為有兩名球員拒射，其實華亞爾都係好好嘅球員，可惜佢唔入。」尹戈爾同時表示後悔冇派秘密武器告魯爾上場：「有得揀我都想用告魯爾守12碼，可惜嘅係我已經用盡3個換人名額。」

承認自己做錯決定嘅尹戈爾，被問到點解喺加時換走理應係第1個射12碼嘅隊長尹佩斯，呢位曼聯「新魔王」解釋指「尹佬」太攰，唔換唔得，不過有球迷陰謀論質疑世盃後轉任曼聯領隊嘅尹戈爾咁做係費事用殘「尹佬」，連累「紅魔鬼」喎！