日本尋日喺世盃C組次輪惡鬥擅守嘅希臘，最終只能以0:0悶和對手，賽事舉行當日撞正大久保嘉人父親生忌，點知呢位前鋒居然喺重要日子上演一幕離門1碼炒飛機，搞到要公開向全國人民道歉；領隊沙哲朗尼亦都成為眾矢之的，除日本女星加藤理惠質疑佢用人策略外，連前主帥薛高都狠批其戰術！

大久保咁傷心，係因為輸波定掛住老竇呢？（法新社圖片）

大久保（13號）離門1碼都射唔入。（美聯社圖片）

日本對希臘一戰，希臘踢到38分鐘就有加素蘭尼斯兩黃一紅被逐，踢多個嘅日本全場控球率高達74%，不過3屆世盃得2個入球嘅希臘排出鐵桶陣，令「藍武士」冇啖好食。其中大久保嘉人更喺68分鐘浪費大好機會，離門僅1碼抽射居然高出慘變失分罪人！6月20日咁啱係大久保嘉人老竇克博嘅生忌，媽媽千里事前亦都話對於呢個「巧合」非常驚訝，相信呢位射手會因此更加內疚。

日媒反轉豬肚救世主變罪人

「藍武士」經兩輪賽事後僅得1分，晉級前景並唔樂觀，一直將大久保嘉人吹捧成「救世主」嘅日本傳媒更加「反轉豬肚」，嘲諷佢即使踢正選都冇波入，大久保賽後亦沉重地公開道歉：「浪費咗呢個黃金機會，真係好可悲，我向所有日本人道歉。」

加藤里惠「挑機」質疑沙帥排陣

不過大久保又唔係冇人撐嘅，日本女星兼記者加藤里惠賽後受訪嗰陣，一邊打機一邊狠批領隊沙哲朗尼用人，除咗覺得遠藤保仁屈居後備係日本組織力大幅下降嘅原因外，又認為大久保比大迫勇也更值得重用。前日本領隊薛高亦都現身抽沙哲朗尼水，指佢「令日本失去獨特嘅風格」，又話：「我都唔明點解佢哋對住防守咁強嘅希臘，都係咁亂斬波入禁區！我喺2005年帶日本喺洲際國家盃對希臘嗰陣用嘅戰術，就夠晒針對性喇。」佢咁激動出嚟閙人，唔通係想趁沙哲朗尼勢危「搲撈」？

日本今次贏唔到亦令一直支持「自己友」嘅前AV女星蒼井空勁冇癮，只能夠喺網上讚吓日本球迷識主動執垃圾，同睇英格蘭對烏拉圭場大戰Relax吓咁話。