李根鎬入波救唔番神獸章魚

南韓今仗派出朴主永擔任正選前鋒，不過領隊洪明甫見呢位阿仙奴前鋒冇乜表現，就喺56分鐘換入李根鎬，呢位射手踢到68分鐘就憑一記遠程炮令俄軍門將艾堅菲夫「燒鬚」犯下「牛油手」，助南韓領先1:0。可惜俄羅斯僅3分鐘後就由基沙哥夫近射扳平比數，最終兩軍賽和1:1完場。

呢場賽事吸引全韓各地市民上街透過電視大銀幕睇波，單單係首爾光化門就有1萬6千人開睇波Party，李根鎬入波之際，無論男定女都興奮大叫、互相擁抱！韓國人民勁興奮，不過有兩隻神獸就冇咁好彩。

服兵役人工得1000蚊

南韓Insite TV就搵嚟一隻八爪魚同一隻章魚嚟估今場賽果，結果八爪魚「貼」俄羅斯贏、章魚就揀咗南韓，由於兩隻「神獸」都估唔中，連叫過胡嘅章魚，賽後都即時畀人做刺身食落肚，李根鎬都救唔到佢。不過當初根本冇「和波」呢個選擇畀佢哋，咁做殘忍咗啲喎！下場分組賽對阿爾及利亞，Insite TV會再搵另外兩隻「神獸」番嚟，希望下次有和波揀啦！

爭啲救番神獸章魚嘅李根鎬「行軍禮」慶祝動作家陣成為全韓熱話，原來呢位喺2013年初開始服兵役、並効力軍隊球隊尚洲尚武嘅前鋒，佢家陣軍階為上等兵，月薪僅得13萬4千6百韓圜（約1,000港元），係本屆賽事736位球員中人工最低嘅一位，加上首次出戰世盃即刻取得入球，難怪佢賽後都話：「感覺實在有啲唔真實！」

李根鎬嘅入球令全韓國陷入一片足球「瘋」潮，先有南韓足球傳奇車範根同囝囝車斗里一齊邊食飯邊睇波，就連有「棒球女神」之稱嘅電視主播崔熙都換上一身紅色裝扮為國家隊打氣，在野黨議員亦喺議會發言，大讚「太極虎」戰士添！同日南韓嘅超市都搵嚟一班靚女，推銷喺南韓世盃賽事期間五折大特價嘅韓牛食品，實行造福全國球迷。

卡比路又衰喺牛油手手上

不過唔係人人都為李根鎬呢粒入波而開心o架，就好似俄羅斯領隊卡比路咁，賽事當日撞正佢老人家生日，點知遇着艾堅菲夫「送禮」贈興，令佢繼上屆世盃領英格蘭時畀門將羅拔格連嘅低級失誤累死之後，再一次遭逢「牛油之災」。