近兩個月受到同尼馬情變傳聞困擾嘅Bruna，踏入馬年似乎運轉乾坤，隨住新劇前日首播更加人氣暴升，Bruna尋日接受訪問公開澄清同尼馬「情未變」，更代送巴塞11號波衫畀同劇演員，證明兩人關係仍然密切。Bruna仲帶埋細妹Luana殺入電視圈，實行「姊妹檔」拍住上搵真銀！

Bruna對耳環值成18萬！

巴西紅爆劇集《Family》第2季前日首播，主角之一Bruna接受訪問，當然被問到佢同尼馬嘅戀情，佢就甜笑住回應：「我哋好好！愛情係一件美麗嘅事情，大家都好開心。」劇中飾演Bruna老竇嘅奧斯卡，更公開尼馬託Bruna送畀佢嘅簽名巴塞波衫：「阿女幫我拎到尼馬件波衫啦！」

着31萬上身

同尼馬嘅戀情重現曙光，紅粉緋緋嘅Bruna出席新劇首播派對嗰陣亦驚艷全場，據巴西媒體報道，Bruna當晚裝扮總值逾4萬美元（約31萬港元），包括價值近18萬港幣嘅鑽石耳環、76,000港幣嘅D&G晚裝、11,000港幣嘅黃金高跟鞋同埋差唔多成5萬港幣嘅LV手袋，直頭係貴氣逼人。

細妹入埋娛樂圈

Bruna除咗有個疊水男友，佢個妹妹Luana亦正式進軍娛樂圈，呢個10歲妹妹仔亦有喺《Family》客串演出，Bruna表示：「妹妹好鍾意做戲，佢覺得好好玩，我認為Luana好有演戲天分。」

遠在西班牙嘅尼馬同丹尼爾，就為早前備戰冬季奧運期間嚴重受傷嘅巴西滑雪女將蘇莎送上祝福，希望佢早日康復。