英超群星玩轉O2體育場!籃網與鷹隊昨晨於倫敦進行海外常規賽大獲成功,有皮雅斯(Paul Pierce)、加納特(Kevin Garnett)及祖莊遜(Joe Johnson)助陣的籃網本身已經星光熠熠,觀眾席更雲集曼聯、曼城、阿仙奴及車路士等英超星級Fans搞旺O2體育場,難怪NBA「準話事人」阿當施華(Adam Silver)計劃每年定期到倫敦開騷啦!

籃網的皮雅斯(右)於海外球迷面前特別搏命。(法新社圖片)

戴倫賓特(左)同迪科爾(中)雞啄唔斷。(法新社圖片)

迪斯高(右)喜遇波斯尼亞同鄉比高域。(Getty Images圖片)

夏薩特(右)畀擁躉捉住合照。(Getty Images圖片)

NBA常規賽周日秩序

周五戰果

可容納兩萬名球迷的O2體育場昨晨座無虛席,當中一眾英超星級應援團更加搶盡風頭,車路士4子大衞雷斯、夏薩特、舒賀爾尼及雲堅基爾、維拉射手賓迪基、曼城前鋒迪斯高及曼聯翼鋒拿尼都有到場睇波。當中「爆炸頭」大衞雷斯更被大批球迷要求簽名、合照,人氣最高。

之不過講到最畀面,肯定非阿仙奴莫屬!「兵工廠」除了舊將皮利斯帶同老婆Jessica到場之外,計落就有包括梅迪薩卡、基奧特及韋舒亞等5個現役「廠仔」撐場,梅迪薩卡更披起同胞舒洛達(Dennis Schroder)的鷹隊戰衣呢!

候任聯盟總裁食過翻尋味

兩支NBA隊伍亦未有令捧場客失望,合演一場大手交易,總共有5位球員得分達雙位數的籃網,憑祖莊遜攻入全場最高的29分,以127:110勇挫鷹隊。睇見現場球迷反應熱烈,下月即將接任聯盟總裁一職的阿當施華都食過翻尋味:「O2體育場設備完善,球迷亦都對NBA好支持,我已經決定每年都會定期喺倫敦舉行海外常規賽。」

明星賽有袖波衫球迷插核突

另外,NBA東西岸明星賽波衫昨日曝光,今鋪聯盟繼續玩有袖設計,美媒揶揄綠色東岸波衫勁「騎呢」,大批球迷亦紛紛於互聯網狂插波衫設計核突。