澳網「煉獄」攞人命，連日來被插爆的組委會，昨面對場內溫度高達51度的酷熱下終肯「低頭」，啟動極熱措施一度叫停部分比賽，以及關閉主場館天幕，造就拿度及禾絲妮雅琪等「幸運兒」在較人道的環境下贏波，難為打早場的「天后」舒拉寶娃就未能受惠，激鬥208分鐘才以2:1險勝姬柏，賽後「暈暈哋」立即要浸冰浴降溫！

舒娃熱到冇晒表情，不斷用凍毛巾降溫。（法新社圖片）

拿度輕取澳洲奀星晉級。（美聯社圖片）

昨日焦點賽果

今日焦點賽事

「舒娃」落場時氣溫已達38度，多次休息轉場都要穿上冰背心，又狂灌飲料避免脫水，但首盤贏6:3後表現開始走樣，以4:6被姬柏扳平。至決勝局進行期間，氣溫升至近42度，場內更不止這個度數，賽會宣布除了進行中的賽事外，其他比賽要暫停，「娃姐」在極熱下體能跌Watt，第10局連失3個「賽點」，最後要打長盤才以10:8險勝，下仗對打到抽泣的法國好手歌妮特。

球手睇唔到個波似畀火燒

「場內的環境實在太令人難受了，我根本打不出最佳水準，其實到最尾幾分鐘我差點暈倒，賽後一定要浸個冰浴呢！」「舒娃」還對賽會連日來未向球員發放有關天氣應變訊息大發牢騷。另一俄國女將柏妮卓高娃贏波後表示，自己感到皮膚像被火燒，另邊廂輸波的美國球手列卓高則高呼熱到聚焦困難、「睇唔到個波」。

反觀「一哥」拿度就在天幕下以6:2、6:4、6:2輕取世界排名570的澳洲奀星高健拿基斯，至於10年來首次不被安排在主場出賽的費達拿，轟出11個「A士」以6:2、6:1、7:6（7:4）氣走卡域斯，齊齊打入32強。此外，澳洲警方日前拘捕的22歲英國男子杜布臣，被指於場內使用無線裝置，向懷疑非法賭波集團發放訊息，甚至操控即場賠率，已正式被落案起訴並於周四上庭。

（now670及671台周五早上8:00直播）