皇馬球員變身「銀河天使」！皇馬前晚舉行一年一度嘅聖誕聚餐，C朗拿度同卡斯拿斯為首嘅球員喺擦大餐之前更化身「天使」，去到兒童醫院大派禮物送暖！沙比阿朗素老婆拿古莉更喺網上「鋪」相，鼓勵一眾「媽咪級」粉絲餵哺母乳，等BB可以過番個溫暖聖誕。

C朗（左）出席皇馬聖誕聚餐時心情靚爆，笑到見牙唔見眼！

皇家馬德里每年都會喺年底搞個由會長皮里茲主持嘅聖誕派對，最具分量嘅足球隊當然都會畀面參加啦！席間隊長卡斯拿斯仍然獲安排同迪史堤芬奴等重要人物坐喺「主家席」，證明地位仍然有番咁上下，不過首次參加嘅教頭安察洛堤，日前就向意大利電視台Rai2表明唔會特別優待身價高嘅球員，暗示加里夫巴利如果冇進步，就會好似近排頻頻嗌走人嘅迪馬利亞咁「入雪櫃」。

「聖卡斯」唔係掛住玩o架，佢喺聚餐之前同C朗等隊友去到馬德里市內醫院，參加「聖誕靈魂基金」嘅慈善活動，向院內嘅小朋友派發足球等聖誕禮物，冧到班細路個個勁開心！Party完咗之後，皇馬仲拉隊喺班拿貝影型仔相，公開佢哋2014年Versace西裝制服添。

沙比嫂鋪相宣揚餵母乳訊息

值得一提嘅係，西班牙《馬卡報》報道指，C朗喺費格遜宣布退休時喺twitter發出嘅致敬訊息，更成為體壇最具影響力嘅一條，證明呢位皇馬球星魅力非凡。佢隊友沙比阿朗素嘅太太拿古莉亦都借助社交網絡嘅威力宣揚正面訊息，呢位「靚媽」上載咗自己抱住出世冇耐嘅囡囡Emma，同時餵哺母乳嘅照片，似乎係希望呼籲一眾媽媽盡量為自己嘅BB餵人奶，健康有營養之餘又唔使去「撲」奶粉咁慘吖嘛！