「賣衫王」C朗傳贏金球獎
C朗勢成金球得主？得獎大熱列貝利嘅金球獎拍攝工作本身進行得如火如荼，點知國際足協突然叫停，令外間猜測C朗可能獲FIFA「內定」得獎，呢位葡萄牙巨星更喺2013年球衣銷售排行榜封王，遠遠拋離影都冇嘅列貝利，就算呢個拜仁翼鋒死撐自己勁過C朗，後者人氣已經贏晒，極有可能反壓封王！
皇馬天王 C朗
拜仁國王 列貝利
西班牙足球電視節目《點球點》尋日爆出猛料，話列貝利嘅金球獎照片拍攝工作忽然被FIFA叫停，搞到呢位法國球星同埋拜仁方面都嬲到震，據知美斯之前連續4年都有參與相同拍攝，最終亦都得獎，即係話列貝利好可能失落獎項，《點球點》甚至指出無論係傳媒、拜仁定列貝利本人都認為，國際足協好可能已經內定由近期表現大勇嘅C朗獲獎！
影親相10成攞獎
的確，C朗近期無論表現定人氣都贏列貝利幾條街，佢首先喺2013年世界球衣銷量排行榜，力壓兩大人氣王美斯同奧斯爾奪冠，相反列貝利就連前10名都冇份（見附表），唔只法國民調超過七成人睇好C朗，連法國國腳馬馬度沙高都「幫理不幫親」咁講：「我會支持C朗，佢係個超級運動員，雖然我內心想投列貝利一票，但數字唔會講大話，C朗啲數據真係太勁喇！」呢個葡萄牙天王仲啱啱獲《馬卡報》頒發2012至13賽季嘅迪史堤芬奴獎（西甲最佳球員獎），風頭一時無兩！
賣衫勁過美斯 奧斯爾
列貝利眼見自己選情告急，惟有把握金球獎延長投票剩低嘅呢3日，盡吓最後努力拉票啦！佢尋日接受法國《Le Monte》訪問時，仍然死撐自己比C朗更值得攞獎：「我對自己嘅實力充滿信心，一啲都唔驚要同其他人爭，反正我已經做晒所有可以做嘅事。係吖，C朗係入咗好多波，但係我都唔少o架喎，而且我哋係唔同類型嘅球員，喺對對手防線施壓方面我做足功課o架！」
NO.1
C朗（皇馬）
NO.2
美斯（巴塞）
NO.3
奧斯爾（阿仙奴）
NO.4
尹佩斯（曼聯）
NO.5
朗尼（曼聯）
NO.6
伊巴謙莫域（PSG）
NO.7
尼馬（巴塞）
NO.8
阿古路（曼城）
NO.9
費蘭度托利斯（車路士）
NO.10
香川真司（曼聯）
