Baby也瘋狂！有「Big Baby」之稱的格連戴維斯（Glen Davis）出名麻煩友，即使今季因傷仍未能為魔術披甲，都照樣於場外搞到一鑊粥！據美媒透露，戴維斯上星期大鬧旅館，得悉冇房租後怒掟Keyboard搞破壞，卒之驚動警方介入，魔術亦需向旅館賠償損失。

格連戴維斯
見場面咁亂，幫佢清理吓啫。（設計對白）

NBA常規賽周五秩序

周三戰果

據美媒《TMZ》透露，戴維斯於美國時間上周六駕車前往一間位於佛羅里達州的汽車旅館，由於當時已是凌晨4點，旅館「Full晒」好正常，但當「Big Baby」被職員告知「全館爆滿」後竟即時失控咆哮，並將詢問處的電腦鍵盤怒掟到大堂，然後憤而離去，發癲過程全被旅館的閉路電視拍低。

魔術即賠錢道歉

該間叫The Travelodge的旅館隨後報警求助，警方到場了解事件後協助旅館聯絡魔術，《TMZ》收到風，該支東岸球隊已向旅館開出支票賠償損失。事件曝光後，戴維斯被魔術會方照肺，昨晨更透過twitter發表道歉聲明補鑊：「關於上周六單嘢，我知自己反應太激，我願意為事件負上全部責任，喺度向魔術、球迷同奧蘭多市民道歉。」

現年27歲的「Big Baby」司職大前鋒，性格火爆的他闖禍多過食飯（見表），加上腳部傷患仍未康復，正處於重建階段的魔術經今次事件後，極可能將戴維斯打入冷宮，趁機會將這位麻煩友送走。

勇士終止連敗

另外，勇士憑史堤芬居里（Stephen Curry）攻入全場最高的25分，主場以113:95擊敗活塞終止兩連敗頹勢，為明早硬撼雷霆一戰注入強心針。（中央5台周五早上11:30直播）

Big Baby麻煩事件簿

‧因暴飲暴食令體重激增，於07年選秀會淪落到次輪才被超音速（雷霆前身）揀中。

‧飲醉酒與朋友大打出手，導致受傷缺席09/10球季部分賽事。

‧於09/10球季鬥活塞的直播賽事當中，爆粗鬧球迷被聯盟罰款。

‧11/12球季鬥馬刺一戰，因不滿被判罰技術犯規，當眾除褲抗議。