戴歷羅斯（Derrick Rose）零角度絕殺正式歸位！事隔551日再次於聯合中心披甲的「牛魔王」，昨日懶理頸痛紮住上，生死關頭更以一記超高難度拋射絕殺得手，率領公牛主場以82:81反勝紐約人開齋。職業生涯第5次於常規賽令對手「冇仇報」，重拾自信的羅斯賽後揚言：「超級球星就係要入呢啲波！」

戴歷羅斯 牛魔王

紐約人臨尾香，安東尼（右）及費頓躁爆。（美聯社圖片）

NBA常規賽周日秩序

因左膝十字韌帶撕裂缺席上季賽事的羅斯，昨晨因為頸部酸痛缺席投射訓練，不過這位公牛Icon就決定頂硬上，於頸部黐上兩張鎮痛貼就落場。

頸痛照頂硬上

雖然羅斯昨仗23投7中僅得18分，更4度被對手封阻，不過當公牛於完場前10.8秒落後1分時，「牛魔王」仍然孭起最後一擊重任，在紐約人中鋒贊特拿（Tyson Chandler）及控衞費頓（Raymond Felton）夾擊下，於底線附近拋投得手，帶挈公牛反超前1分並奠定勝局，睇到紐約人「死忠」名導演史碧奇李（Spike Lee）扁晒嘴。

聽朝鬥76人單挑MCW

職業生涯第5次在第4節或加時的最後10秒完成反超前投射，「絕殺之王」羅斯用行動宣布昔日呼風喚雨的「牛魔王」已經歸位，這位公牛Icon賽後稱：「我有責任射最後一球，超級球星就係要入呢啲波！聯合中心嘅球迷特別熱情，搞到我好感動。」

終於敲響新季勝鼓的公牛，明早會造訪76人，羅斯鬥首演表現搶鏡的新秀卡特威廉士（Michael Carter-Williams）的比併勢成焦點。