灰熊波癡班主用慈善擺「波神」上枱！米高佐敦（Michael Jordan）復出傳聞愈吹愈熱，灰熊老闆佩拉（Robert Pera）「等唔切」，決定用慈善做牌頭引佐敦出山，揚言只要該名山貓班主接受One On One挑戰，就即刻「科水」捐100萬美元（約775萬港元）予一間兒童醫院！

傳MJ出戰一場常規賽

NBA球評家積倫羅斯（Jalen Rose）出名收風勁，去季就率先爆出占士夏登（James Harden）會被雷霆交易，這位溜馬名將上星期接受網站Grantland訪問時又爆出猛料，指米高佐敦今季會以50歲高齡再戰籃壇，為旗下的山貓出戰1場常規賽，藉此谷行該隊入座率及波衫銷量。「波神」會否第3度出山仍屬未知數，不過灰熊班主佩拉就認真絕，竟然用慈善逼「波神」落場。

打得成即捐775萬

現年35歲的佩拉出名波癡，上個月已經試過籌辦慈善活動，以One On One形式挑戰旗下手足東尼阿倫（Tony Allen），不過場波就未打得成，對於傳媒要求單挑小牛老闆古班（Mark Cuban），佩拉決定打蛇隨棍上，日前透過twitter向佐敦下戰書：「如果大家想睇班主大戰，咁不如由我嚟單挑MJ（米高佐敦）！佢肯應戰我即刻捐100萬美元。」

佩拉並非得個「吹」字，《紐約每日新聞》上載了一條短片，佩拉近期在灰熊教練指導下苦練球技，投籃、剷籃、帶波過人瓣瓣都有板有眼。旗下球隊灰熊為迎接新球季亦一樣Ready，昨日靠馬克加素（Marc Gasol）貢獻18分、6個籃板及7次助攻，主場以102:99勇挫公鹿。至於以82:100不敵巫師的熱火，明早造訪籃網合演星級季前賽。

（now678台周五早上8:00直播）