「牛魔王」強勢回歸！NBA季前賽昨日正式展開，公牛巨星戴歷羅斯（Derrick Rose）經歷525日的養傷黑暗日子後，昨晨作客溜馬一戰終於再度登場。戴歷羅斯雖然僅出戰20分26秒，但就攻入13分帶領球隊以82:76贏波，出色表現令人相信其傷勢已完全康復，而且戴歷羅斯更自爆，自己受傷後比受傷前跳高多5吋！

戴歷羅斯（1號）睇落完全好番晒。（法新社圖片）

賽前羅斯不斷為左膝做簡單熱身。（美聯社圖片）

羅斯的速度比傷前毫不遜色。（美聯社圖片）

搏對手進攻犯規唔錫身

戴歷羅斯上次出現賽場要追溯至2012年4月29日，準備在季後賽發威的公牛，竟在首仗就收到戴歷羅斯重創噩耗，左膝十字韌帶撕裂令其休戰超過1年。戴歷羅斯昨仗對溜馬復出，儘管剛傷愈回歸，但於攻防兩端依然毫不錫身，更不惜倒地造成對手進攻犯規，難怪一眾公牛記者皆讚嘆不已：「佢嘅速度仲喺度，我哋熟悉嘅羅斯又返嚟啦！」

戴歷羅斯今場表現令人驚喜，多次強行突破令溜馬招架不住。戴歷羅斯於休息時仍有為膝蓋進行冰敷，可見他對傷勢仍非常謹慎，他賽後表示：「可以隨心所欲打波感覺真係好，呢場只係季前賽，我仲未知幾時可以適應高強度比賽。」不過戴歷羅斯透露，他剛入NBA時垂直跳為37吋，但最新測試結果增至約42吋，他說：「我覺得自己比以前跳得更高！」

跑得太快出現失誤

公牛主帥泰保杜（Tom Thibodeau）亦表示，戴歷羅斯今場出現4次失誤，是因為他「跑得太快」，需要時間適應比賽節奏。有部分公牛球迷專門前赴溜馬主場為戴歷羅斯加油，當他首次觸球時更瘋狂吶喊，令「牛魔王」非常激動。戴歷羅斯復出情況理想，泰保杜將逐步增加他的上陣時間，助他盡快重回昔日的水準，趕及常規賽的開鑼戰。