職業球員除了好波之外，形象都好重要，占士夏登（James Harden）的大鬍子及安東尼戴維斯（Anthony Davis）的一字眉都夠晒出位，並衍生出不少周邊商品，不過上述兩人新季將受到「掃把頭」挑戰！「掃把頭」乃路爾的標誌，這個出位髮型除了令這位新秀睇落高多3吋，更為他吸納不少Fans，即使仍未於NBA戰場獻技，但其twitter「追隨者」已經突破12萬大關，勁過不少NBA球星多多聲，難怪路爾堅持「永遠唔轉Look」啦！

兩星期修一次髮

據路爾向《華盛頓郵報》所講，原來這個「掃把頭」是源自韋史密夫的90年代造型，路爾稱：「我自細就晚晚追睇《Fresh Prince of Bel Air（新鮮王子妙事多）》，韋史密夫陪住我長大，所以我會一直留呢個頭。」原來路爾勁姿整，每兩星期就會到哈林區髮型屋「修一修」，相信76人市場部係時候諗諗計，設計一系列「掃把頭」產品掠水。