新季NBA常規賽10月底開鑼，76人新秀路爾（Nerlens Noel）因為右膝重創要到12月先可以正式登場，加上季前被列強睇衰導致失落「狀元」寶座，NBA之路荊棘滿途。不過這位出身自海地貧苦家庭的「防守王」，不時以母親捱更抵夜湊大家中三兄弟的辛酸史自我激勵，決心在NBA大舞台追隨偶像加納特（Kevin Garnett）的步伐，誓要令在選秀會向他耍手擰頭的球隊嘆走寶。

可兼任中鋒及大前鋒的路爾，去年於肯塔基大學場均貢獻4.4個封阻及2.1次偷波，早已在大學籃球界被譽為「新莫湯保」，有球評家更指路爾若能增磅，NBA未來15年將是其天下。路爾於今年2月右膝前十字韌帶撕裂，嚇怕一眾NBA隊伍，堂堂「準狀元」慘變第6順位新秀，甫踏足NBA即遇上極大挫折，然而路爾自信能闖出一片天，並以母親的辛酸史作前進推動力：「做唔到狀元唔係世界末日，當諗起阿媽要打兩份兼職維持生計，我呢啲少少苦楚算得係咩？」

報答母親辛酸養育之恩

路爾4歲由海地移居美國波士頓，任職的士司機的父親約尼爾及後拋妻棄子，母親杜絲娜為餬口焗打兩份醫院清潔工，日日早出晚歸至晚上11時半才回家，天未光就放低食物及洗好的衣服在枱上然後又外出。街坊街里睇見路爾一家經濟不景氣，主動接載路爾返學及幫忙籌錢支付其課外活動費用，高中籃球教練迪拜亞素亦不時買佳得樂及麥樂雞給路爾醫肚，艱辛童年令路爾堅定自信，向籃球事業進發。

欣賞加納特食腦打法

路爾向《ESPN》稱：「媽媽因為背部勞損，依家已經冇能力打工，所以我一定要喺NBA有一番作為，畀最好嘅生活佢！」身為塞爾特人支持者的路爾，一直視「綠軍」名將、今季已轉投籃網的加納特為偶像，並表示最欣賞「KG」的食腦打法，期望有朝一日能追趕其籃壇成就。

將於12月才可復出的路爾，原本想揀選76人的6號球衣，但由於會方已榮休「J博士」艾榮（Julius Erving）的6號波衫，故路爾才揀4號。被問到為何對6號情有獨鍾，該位新秀咬牙切齒稱：「騎士、魔術、巫師、山貓、太陽同塘鵝呢6隊都唔想要我，我希望用呢個數字提醒自己，新球季一定要令佢哋後悔！」

路爾Profile

出生日期：1994年4月10日（19歲）

國籍：美國

身高/體重：6呎11吋/103公斤

選秀排名：首圈第6位（被塘鵝揀中，然後交易至76人）

位置：大前鋒/中鋒

肯塔基大學場均數據：10.5分、9.5個籃板、4.4次封阻、2.1次偷波、59%命中率