戴歷羅斯（Derrick Rose）抵港鋤爆樽，強勢迎接新球季！這位公牛球星昨日旋風式襲港，雖然「牛魔王」闊別球場足足年半，但身形依然屬「戰鬥格」，踩入麥花臣獻技更三度表演招牌式「大力鋤樽」，膝傷明顯痊愈，用行動宣告強勢回歸！

一班「羅斯粉」見到偶像不停影相。

抱起小朋友射籃，盡顯羅斯父愛一面。

羅斯訪港
羅斯表演大力鋤樽，Fans應該好耐未見過。

戴歷羅斯

方誠義（左）同羅斯拗手瓜不分勝負。（潘彥韜攝）

羅斯昨由東莞抵港，約下午3時半左右抵達adidas旺角Megastore，展開「DRose亞洲之旅香港站」活動，由於昨日是星期五，不少「羅斯粉 」都要返工返學．故Megastore門外僅得近百Fans守候，卻仍無損「牛魔王」靚爆心情。

同「阿GA」拗手瓜

首度訪港的羅斯全程「四萬咁口」，於店內收到大會送出的燈籠後勁雀躍，之後又與甲一球員方誠義（阿Ga）「拗手瓜」，接受完連串訪問後便在逾10名保鑣護送下前往麥花臣室內場館上演「重頭戲 」!

望見「阿GA」、梁民熊、劉子健、鄭錦興、張偉康及謝文俊幾位甲一球員打得興起，原本「齋睇」的羅斯 「忍唔住」加入戰團玩3on3，一落場就命中3分球，之後更以一記入樽將現場近千球迷的情緒推到頂點。

今午轉赴菲律賓

之後羅斯仍未夠喉，在投籃比併時又兩次施展「大力鋤樽」冧Fans，證明左膝傷勢經已「好番晒」。期間羅斯更抱起小朋友投籃，活動尾聲又狂掟簽名籃球上觀眾席，表現親民到爆，各位「羅斯粉」應該收貨！「牛魔王」今午就會離港轉赴菲律賓，展開最後一站宣傳工作。