世界游泳錦標賽周五揭幕 （目及）實5大美人魚

（19日開幕式後，翌日展開跳水、韻律泳及公開水域賽事，游泳賽事於28日開鑼。）

「匈牙利泳模」積嘉寶絲

身兼泳手及Model兩職，鍾國樑形容是「男人都會喜歡的中歐女孩」。除了外表，亦有爭獎實力：「佢喺混合泳同蝶泳都有發圍機會，其中400混合泳有機會遇上中國葉詩文，到時睇吓佢狀態夠唔夠弗喇！」

「澳洲之星」芭妮特

游水游到獲頒澳洲勳章，跟「老死」萊絲常以孖妹形象出現，出征巴塞前小妮子與泳隊到泰國集訓，今次世界賽力爭200及400米自由泳金牌。

「美國甜心」富蘭克琳

鍾國樑認為富蘭克琳是女子泳壇的奇葩：「佢喺倫奧已經攞咗4金，今次亦入圍100、200米背泳及自由泳、50背，連同接力，佢分分鐘擸走7至8面獎牌甚至金牌，我好期待佢做唔做到『女版菲比斯』。」

「上海蝶后」陸瀅

陸瀅曾與劉翔合照顯露導彈身材，成為傳媒經常談論的對象，不過她表示已經習慣。「肥樑」表示陸瀅在世界短池賽游得唔錯，贏得50蝶金牌，希望今次在長池有所突破！

「意國天后」佩歷珍妮

情史及賽績同樣引人入勝，領軍出征巴塞即成官網頭條新聞。她放棄強項中距離項目，轉攻背泳，望走出倫奧失利陰影，重新出發。

世界賽小資料

日期：7月19日至8月4日

地點：巴塞隆拿（聖喬治宮體育館）

賽項：游泳*、水球、跳水、韻律泳

總獎金：310萬美元（約2,418萬港元）

破世界紀錄獎金：25,000美元（約19.5萬港元）

註：*游泳比賽於7月28日展開

（有線62及高清202周六晚上11:30起直播）